ԱՄՆ նախագահ Դոնալդ Թրամփը հանձնարարել է առևտրի նախարարությանը 100 տոկոս մաքսատուրք սահմանել արտասահմանյան ֆիլմերի համար։
Truth Social սոցիալական ցանցում նա գրել է․ «Ամերիկայի կինոարդյունաբերությունը շատ արագ է մահանում։ Այլ երկրներ տարբեր գրավիչ առաջարկներ են անում մեր կինոգործիչներին և ստուդիաներին՝ Միացյալ Նահանգներից նրանց դուրս բերելու համար»։
Նրա խոսքով՝ Հոլիվուդը «դատարկվում է», ինչը «ազգային անվտանգության համար սպառնալիք» է։
Հունվարին Թրամփը հայտնի կինոաստղեր Սիլվեստր Ստալոնեին, Մել Գիբսոնին և Ջոն Վոյթին նշանակել էր Հոլիվուդում հատուկ դեսպաններ՝ նպատակ ունենալով ուժեղացնել կինոարտադրության ոլորտը։
Կինոարտադրողները տարիներ շարունակ հեռանում են Հոլիվուդից՝ նախապատվություն տալով հարկային արտոնություններ ունեցող երկրներին, որտեղ նկարահանումներն ավելի էժան են։
FilmLA-ի՝ տարածաշրջանի արտադրությանը հետևող ոչ առևտրային կազմակերպության տվյալներով՝ Լոս Անջելեսում կինո և հեռուստատեսային արտադրությունը վերջին տասնամյակում նվազել է գրեթե 40%-ով։
Ըստ The Wall Street Journal-ի՝ այս տարվա ամենաշատ եկամուտ ստացած «Minecraft: The Movie» ֆիլմը նկարահանվել է արտասահմանում։ Դրսում են նկարահանվել նաև «Mission: Impossible — The Final Reckoning»-ը և «Jurassic World: Resurgence»-ը։
