ՀՀ ԱԳ նախարար Արարատ Միրզոյանը համատեղ մամուլի ասուլիսում հայտարարել է, որ Իրանի ԱԳ նախարար Աբբաս Արաղչիի առաջին այցն է Հայաստան։
Նա նշել է, որ նախարարի հետ քննարկումների ընթացքում ընդգծվել է երկու երկրների միջև տնտեսական փոխգործակցության կարևորությունը։ «Վերջին տարիներին գրանցվել են մի շարք շոշափելի հաջողություններ։ Կարող ենք արձանագրել, որ 2024 թվականին երկկողմ առևտրաշրջանառության ծավալը գերազանցել է նախորդ առնվազն 5 տարիների ցուցանիշը, և սա կարևոր արդյունք է»,- ասել է Միրզոյանը։
Նրա խոսքով՝ այսօր շարունակվել են քննարկումները առևտրաշրջանառությունը երեք միլիարդ դոլարի հասցնելու հնարավորությունների շուրջ։ Այս համատեքստում ընդգծվել է նաև, որ առկա հնարավորությունները լրացվել են ԵԱՏՄ-ի և Իրանի միջև ազատ առևտրի համաձայնագրի կնքմամբ։
Նախարարը նշել է, որ Իրանն ունի մասնակցություն Հայաստանի տնտեսական ենթակառուցվածքային ծրագրերի իրականացման գործում, որոնք ոչ միայն տնտեսական, այլև ռազմավարական նշանակություն ունեն։ Մասնավորապես՝ Քաջարան-Ագարակ ճանապարհահատվածի 32 կիլոմետրանոց հատվածը, որի շինարարությունը վստահվել է իրանական ընկերությանը, «Խաղաղության խաչմերուկ» նախագծի կարևոր բաղադրիչներից է։
«Այսպիսով, կարող ենք փաստել, որ Իրանը ոչ միայն առաջին պետություններից էր, որ ողջունեց մեր խաղաղության նախաձեռնությունը, այլև գործնականում ներգրավված է այդ նախագծի կյանքի կոչման մեջ»,- ընդգծել է նախարարը։
Գործընկերոջ հետ, ՀՀ օրակարգային հարցեր քննարկելու զուգահեռ, բնականաբար անդրադարձ է եղել նաև տարածաշրջանային իրողություններին և զարգացումներին։
ԱԳ նախարարը ներկայացրել է Ադրբեջանի հետ միջպետական սահմանի սահմանազատման և խաղաղության համաձայնագրի կնքման գործընթացների վերջին զարգացումները։ «Վերստին ընդգծել եմ Հայաստանի հանձնառությունը՝ տարածաշրջանում երկարաժամկետ խաղաղության և կայունության հաստատման գործում, որի կարևոր հանգրվաններից կարող է դառնալ խաղաղության համաձայնագրի՝ արդեն իսկ ամբողջությամբ համաձայնեցված տեքստի ստորագրումը»,- նշել է նա։
Նախարարը շնորհակալություն է հայտնել բարեկամ Իրանի կառավարությանը՝ խաղաղության համաձայնագրի տեքստի համաձայնությունը ողջունելու և ստորագրումը կարևորելու համար։
«Բազմիցս ընդգծել ենք, որ մենք բարձր ենք գնահատում Իրանի հստակ դիրքորոշումը Հայաստանի Հանրապետության տարածքային ամբողջականության և ինքնիշխանության անձեռնմխելիության վերաբերյալ։ Ինչպես Իրանի, այնպես էլ Հայաստանի համար մեր պետությունների միջև սահմանի անքակտելիությունն ունի կենսական նշանակություն»,-ասել է Միրզոյանը։
Նախարարի խոսքով՝ այսօրվա հանդիպման ընթացքում հնարավորություն է եղել հանգամանալից քննարկել նաև միջազգային օրակարգի մի շարք այլ խնդիրներ։ «Ես վերահաստատել եմ Երևանի պատրաստակամությունը՝ մեր ավանդը բերելու Իրանի և մեր այլ բարեկամ պետությունների միջև երկխոսությանը»,-ասել է նա։
«Հարգելի ներկաներ, իհարկե, այսօր առանձնահատուկ ուրախ եմ Արտաքին գործերի նախարարության հարկի տակ հյուրընկալելու նախարար Արաղչիի «Բանակցության ուժը» գրքի շնորհանդեսը։
Հարգելի պարոն նախարար, վերահաստատում եմ, որ Հայաստանը կարևորում է Իրանի հետ բարեկամությունը։ Այդ հարաբերությունները նաև երկու քաղաքակրթությունների միջև ամուր կապի լավագույն դրսևորումն են։ Մենք գնահատում ենք երկու երկրների միջև սերտ փոխգործակցությունը և լիահույս ենք, որ կշարունակենք համատեղ քայլեր ձեռնարկել՝ առկա ներուժի իրացմանն ուղղված ծրագրերը կյանքի կոչելու ուղղությամբ՝ ի բարօրություն մեր երկրների և ժողովուրդների։
Շնորհակալություն»։
