Հայոց ցեղասպանության միջազգային ճանաչումը մեր արտաքին քաղաքական առաջնահերթությունների մեջ չի մտնում, ասել է ՀՀ վարչապետ Նիկոլ Փաշինյանը՝ պատասխանելով թուրք լրագրողի հարցին, թե ցեղասպանությունն արդեն նախկի՞ն, անցյալ փուլ է ՀՀ-Թուրքիա հարաբերությունների առումով։
«Հայոց ցեղասպանության միջազգային ճանաչումը մեր արտաքին քաղաքական առաջնահերթությունների մեջ չի մտնում։ Սա պաշտոնական ձևակերպում է, բայց այս համատեքստում կան հարցեր, որոնց պարզաբանումը շատ էական է և կարևոր, բայց այդ հարցերի շուրջ ես հիմնականում աշխատանքային ռեժիմով անընդհատ խոսում եմ՝ և Հայաստանում, և արտերկրում մեր հայրենակիցների հետ զրույցում։
Լավ առիթ է, որ նաև հրապարակային խոսեմ։ Այդ քննարկումները և շահարկումները նաև ՀՀ-ում և ոչ միայն ՀՀ-ում լինում են։ Խոսվում է ուրացման, Մեծ Եղեռնը ուրանալու կամ մոռանալու մասին, ուզում եմ՝ շատ հստակ լինի, որ Հայաստանում և հայության շրջանում դա անառարկելի ճշմարտություն է, այսինքն՝ ուղղակի մեր իրականության մեջ հնարավոր չէ դա ժխտել կամ ուրանալ, բոլորիս համար դա անուրանալի ճշմարտություն է»,- ասել է նա։
Խոսելով երկու երկրների միջև հարաբերությունների մասին, նա ասել է․ «Միանշանակ կցանականամ, որ Հայաստանի և Թուրքիայի միջև հաստատված լինեն դիվանագիտական հարաբերություններ, սահմանը բաց լինի երկաթուղային, ավտոտրանսպորտային հաղորդակցությունների համար, գործարար կապերը լինեն ուղիղ։
Հայաստանի և Թուրքիայի միջև ներկա դրությամբ կա ուղիղ երկխոսություն։ Եթե հաշվի առնենք մեր հարաբերությունների նախընթաց շրջանը, սա շատ կարևոր փոփոխություն է։ Նախկինում զրկված ենք եղել միմյանց տեսակետներն իրար հետ ճշտելու հնարավորությունից»։
