Կանադայի վարչապետի թեկնածու Մարկ Քարնին հայտարարել է, որ պատրաստ է նորացված առևտրային համաձայնագրի շուրջ բանակցել նախագահ Դոնալդ Թրամփի հետ, եթե «հարգվի Կանադայի ինքնիշխանությունը»:
BBC-ի փոխանցմամբ՝ Քարնին այս հայտարարությունն արել է Օնտարիոյի Համիլթոն քաղաքում գտնվող պողպատի գործարան կատարած այցի ժամանակ։ Կանադան ԱՄՆ-ից ներմուծման համար փոխադարձ մաքսատուրքեր է սահմանել՝ 29,8 միլիարդ կանադական դոլարի (20,7 միլիարդ դոլար) չափով։
Մինչ այդ, ԱՄՆ նախագահ Դոնալդ Թրամփը 25% մաքսատուրք էր սահմանել երկիր ներմուծվող ամբողջ պողպատի և ալյումինի համար:
Թրամփի պաշտոնը ստանձնելուց հետո ԱՄՆ-ն և Կանադան ներքաշվել են առևտրային պատերազմի մեջ։ ԱՄՆ նախագահը բազմիցս սպառնացել է բռնակցել իր հարևանին:
Չորեքշաբթի Քարնին դատապարտել է ԱՄՆ-ի մաքսատուրքերի վերջին փուլը՝ անվանելով այն «չհիմնավորված»: «Մենք բոլորս ավելի լավ վիճակում կլինենք, երբ վերականգնվի և վերսկսվի աշխարհի ամենամեծ տնտեսական և անվտանգության գործընկերությունը», — ասել է նա: Կանադան ԱՄՆ-ին պողպատի և ալյումինի ամենամեծ արտասահմանյան մատակարարն է:
Թրամփը մաքսատուրքերի բարձրացումը հիմնավորել է՝ նշելով, որ դրանք անհրաժեշտ են ԱՄՆ-ի ազգային անվտանգության և ներքին արտադրողների պահանջարկը մեծացնելու համար, որը, նրա պնդմամբ, «ճնշվել է» արտաքին մրցակցության պատճառով:
Ի պատասխան՝ Կանադան հայտարարել է մաքսատուրքեր ԱՄՆ ապրանքների, այդ թվում՝ պողպատի և ալյումինի վրա։
Նոր մաքսատուրքերը ներառում են մի շարք ապրանքներ, այդ թվում՝ 12,6 մլրդ դոլար՝ պողպատի, 3 մլրդ դոլար՝ ալյումինի, ինչպես նաև գործիքների, համակարգչային սարքավորումների, ջրատաքացուցիչների, սպորտային սարքավորումների և թուջե արտադրանքի համար:
Փորձագետները նշում են, որ աճող առևտրային վեճը սպառնում է երկու երկրների տնտեսական կայունությանը:
Չորեքշաբթի օրը Կանադայի կենտրոնական բանկը նվազեցրել է վերաֆինանսավորման տոկոսադրույքները 3%-ից հասցնելով մինչև 2,75%՝ երկրի տնտեսությունը խթանելու համար:
