Սաուդյան Արաբիայի Ջիդդա քաղաքում Ուկրաինայի և ԱՄՆ-ի պատվիրակությունների միջև Ուկրաինայում ռազմական գործողությունների մասնակի դադարեցման շուրջ բանակցություններ են սկսվել, հայտնել է Ուկրաինայի արտաքին գործերի նախարարությունը։
Բանակցությունների առանցքում «խաղաղության համաձայնագրի շրջանակային պայմաններին և նախնական հրադադարին» վերաբերող հարցերն են, հաղորդում է AFP-ն: Կիևն առաջարկում է հրադադար հաստատել օդում և ծովում։
Ամերիկյան պատվիրակությունը գլխավորում են պետքարտուղար Մարկո Ռուբիոն և ազգային անվտանգության հարցերով խորհրդական Մայք Ուոլցը, իսկ Կիևը ներկայացնում են Ուկրաինայի նախագահի գրասենյակի ղեկավար Անդրեյ Երմակը, ԱԳ նախարար Անդրեյ Սիբիհան և պաշտպանության նախարար Ռուստեմ Ումերովը։
Ուկրաինայի նախագահ Վլադիմիր Զելենսկին նույնպես նախօրեին մեկնել էր Ջիդդա՝ հանդիպելու Սաուդյան Արաբիայի գահաժառանգ արքայազն Մուհամեդ բեն Սալմանի հետ։ Նա չի մասնակցի բանակցություններին.
Ինչպես Ռուբիոն ասել է հանդիպումից առաջ, այս բանակցությունները «առանցքային» կլինեն Կիևին ԱՄՆ ռազմական օգնության վերականգնման հարցում։ «Կարծում եմ, եթե այնտեղ լավ հանդիպում լինի, որը մեզ դուր գա, և որի մասին զեկուցենք նախագահին, ապա որոշումներ կկայացվեն դադարի (ռազմական օգնության) վերաբերյալ »,- ասել է պետքարտուղարը։
