Իսրայելը կարողացավ վնաս հասցնել Իրանի պաշտպանունակությանը և նրա հրթիռային արտադրությանը, Իսլամական Հանրապետության դեմ Իսրայելի հարվածը «հզոր էր» և «հասավ իր բոլոր նպատակներին», հայտարարել է Իսրայելի վարչապետ Բենիամին Նեթանյահուն 2023 թվականի հոկտեմբերի 7-ին տեղի ունեցած հարձակման զոհերի հիշատակին նվիրված պետական արարողության ժամանակ։
«Մենք հզոր հարված ենք հասցրել Իրանի պաշտպանական կարողությանը»,- ասել է նա։ «Դա ճշգրիտ և հզոր հարված էր, և այն հասավ իր բոլոր նպատակներին»,- հավելել է Նեթանյահուն։
Նեթանյահուն կրկնել է իր տեսակետը, որ Իսրայելը 2023 թվականի հոկտեմբերի 7-ից հետո «պատերազմ է մղում իր գոյության համար», որը «պարտադրվել է իրեն»։ «Այս պատերազմն ընթանում է յոթ ճակատով Իրանի գլխավորած չարի առանցքի դեմ: Ինչպես ցանկացած պատերազմում, մենք ստիպում ենք յուրաքանչյուրին, ով ցանկանում է խլել մեր կյանքը, շատ թանկ գին վճարել»,- ասել է նա՝ հիշեցնելով Բեյրութում շիական «Հեզբոլլահ» կազմակերպության առաջնորդ Հասան Նասրուլլայի սպանության մասին։ «Դրանից հետո Իրանը հարյուրավոր հրթիռներով հարձակվեց Իսրայելի վրա», — ասել է Իսրայելի վարչապետը։ Իսրայելը «պահել է իր խոստումը» և հակահարված տվել Իրանին, հավելել է Նեթանյահուն։
Իրանի գերագույն առաջնորդ այաթոլլա Ալի Խամենեին ձեռնպահ է մնացել Իսրայելի կողմից իր երկրի վրա հարձակման վերաբերյալ պատասխան քայլեր ձեռնարկելու կոչից։
«Երկու գիշեր առաջ Իսրայելի ռեժիմի չար գործողությունները չպետք է չափազանցվեն կամ նսեմացվեն», — ասել է Խամենեին: «Իսրայելական ռեժիմի սխալ հաշվարկները պետք է խափանվեն։ Կարևոր է նրանց հասկացնել, թե ինչ ուժ, կամք և նախաձեռնություններ ունի Իրանի ժողովուրդն ու նրա երիտասարդությունը»:
Իրանի արտաքին գործերի նախարար Սայիդ Աբբաս Արաղչին ՄԱԿ-ի գլխավոր քարտուղարին ուղղված նամակում ասել է, որ Իրանը իրեն իրավունք է վերապահում պատասխանել Իսրայելի «հանցավոր ագրեսիային»:
Իրանի արտաքին գործերի նախարարությունը հայտնել է, որ նախարարը գրել է Անտոնիո Գուտերեշին՝ կոչ անելով Անվտանգության խորհրդի նիստ հրավիրել՝ դատապարտելու Իրանին հասցված Իսրայելի վերջին հարվածները:
