89 տարեկանում մահացել է ֆրանսիացի հայտնի դերասան Ալեն Դելոնը։ Այս մասին հայտնում է Agence France-Presse-ը՝ վկայակոչելով նրա երեք երեխաների համատեղ հայտարարությունը։
Նշվում է, որ նա մահացել է ֆրանսիական Դուշի կոմունայի իր տանը՝ շրջապատված երեխաներով ու ընտանիքով։
Ալեն Դելոնը ֆրանսիական կինոյի և թատրոնի դերասան է, կինոպրոդյուսեր, սցենարիստ և ռեժիսոր։ Նա համարվում է ոչ միայն եվրոպական կինոյի աստղ ու սեքս խորհրդանիշ, այլև «կինոյի պատմության ամենագեղեցիկ կինոդերասան»։
Դերասանն իր կարիերան սկսել է 1957 թվականին։ Նրա մասնակցությամբ ամենահայտնի ֆիլմերից են՝ «Պայծառ արևի վրա» (1960), «Ռոկկոն և իր եղբայրները» (1961), «Ընձառյուծ» (1963, ներկայացվել է «Ոսկե գլոբուսի» «տղամարդկանց շրջանում ամենախոստումնալից նորեկ» անվանակարգում)։ Արժանացել է «Սեզար» մրցանակի «Մեր պատմությունը» ֆիլմում (1984) տղամարդու լավագույն դերակատարման համար։
1990-ականներից ի վեր նա հազվադեպ է երևացել էկրաններին, վերջին անգամ հանրությանը ներկայացել է 2019 թվականին՝ Կաննի կինոփառատոնին «Ոսկե արմավենու ճյուղը» ստանալու ժամանակ։
Վերջին տարիներին Դելոնը հազվադեպ էր լքում իր կալվածքը։ Դերասանը 2019 թվականին կաթվածից հետո առողջական խնդիրներ ուներ։
