ԱՄՆ փոխնախագահ Քամալա Հարիսն ասել է, որ երախտագիտությամբ է ընդունում Ջո Բայդենի աջակցությունը, որը հրաժարվել է մասնակցել նախընտրական արշավին և առաջարկել է իրեն առաջադրել որպես Դեմոկրատական կուսակցության թեկնածու։ Հաղորդվում է, որ նա արդեն սկսել է պայքարել առաջադրման համար՝ փորձելով աջակցություն ստանալ կուսակիցների կողմից:
«Ինձ համար պատիվ է ունենալ նախագահի աջակցությունը, և ես մտադիր եմ առաջադրվել: Ընտրությունների օրվան ունենք 107 օր։ Մենք կպայքարենք միասին և կհաղթենք՝ միասին»,- ասել է նա։
Փոխնախագահի խոսքով՝ Բայդենի՝ ընտրություններից դուրս գալու որոշումը հայրենասիրության օրինակ է։ «Նախագահ Բայդենն անում է այն, ինչ արել է իր ողջ կյանքում՝ առաջին տեղում դնելով ամերիկյան ժողովրդի և մեր երկրի շահերը»:
Դեմոկրատները դեռ պաշտոնական թեկնածու չունեն. չնայած այն բանին, որ Բայդենը աջակցություն է հայտնել Հարիսին, չի կարելի ասել, որ նա մրցակիցներ չի ունենա։ Քվեարկությունը տեղի կունենա օգոստոսի 19-ին Չիկագոյում հրավիրված Դեմոկրատական կուսակցության համագումարում:
Աղբյուրները BBC-ին հայտնել են, որ Հարրիսն արդեն սկսել է հեռախոսով բանակցություններ վարել՝ ապահովելու համար նշանավոր դեմոկրատների, այդ թվում՝ օրենսդիրների և նահանգապետերի աջակցությունը:
Հարիսի թիմը «որոշել է ամեն ինչ անել» և հնարավորինս շատ աջակցություն ստանալ թեկնածության առաջին քվեարկությունից առաջ՝ ասել են աղբյուրները CNN-ին:
Թիմը նաև սկսել է նամակներ ուղարկել Հարրիսի անունից՝ նվիրատվություններ հայցելու համար:
ActBlue դրամահավաք հարթակից հայտնում են, որ նկատվում է Հարրիսի արշավին նվիրատվությունների զգալի աճ․ Բայդենի հայտարարությունից հետո առաջին հինգ ժամվա ընթացքում հավաքվել է ավելի քան 27,5 միլիոն դոլար, մի քանի ժամ անց հավաքված գումարը հասել է 46,7 միլիոն դոլարի:
