ԱՄՆ Պետքարտուղարը բարձր է գնահատել Թաթուլ Մարգարյանի ներդրումը հայ- ամերիկյան հարաբերությունների ամրապնդման գործում
ԱՄՆ-ում դիվանագիտական առաքելության ավարտի կապակցությամբ ՀՀ դեսպան Թաթուլ Մարգարյանին հասցեագրված գրավոր ուղերձ է հղել ԱՄՆ Պետքարտուղար Ջոն Քերրին, ով նշում է, որ ամերիկյան ժողովրդի և Օբամայի վարչակազմի անունից իր լավագույն բարեմաղթանքներն է հղում:
ԱՄՆ հեղինակավոր կոնգրեսականներ Աննա Էշյուն և Ֆրենկ Պալոնեն Ներկայացուցիչների պալատի ընդլայնված նիստում ԱՄՆ-ում ՀՀ դեսպան Թաթուլ Մարգարյանի՝ դիվանագիտական առաքելությունն ավարտելու կապակցությամբ նույնպես իրենց շնորհակալական խոսքն են հայտնել: Այս մասին հաղորդում են ԱՄՆ-ում ՀՀ դեսպանատան մամուլի ծառայությունից:
Կոնգրեսական Աննա Էշյուն շնորհակալություն է հայտնել դեսպան Մարգարյանին` անցած ինը տարիներին ԱՄՆ Կոնգրեսի հետ ունեցած ջերմ հարաբերությունների և բարեկամության համար:
ԱՄՆ Կոնգրեսի անդամ Ֆրենկ Պալոնեն էլ ասել է, որ Վաշինգտոնում իր պաշտոնավարման ընթացքում նա հուժկու աջակցություն է ցուցաբերել Կոնգրեսում Հայոց ցեղասպանության ճանաչման գործընթացին, ինչպես նաև Կոնգրեսի կողմից ԼՂՀ-ին և Հայաստանին օգնելու հարցում:
