Երեւանն ու Պաքուն խաղաղութեան հասնելու բացառիկ հնարաւորութիւն ունին, յայտարարեց Ամերիկայի պետական քարտուղար Էնթոնի Պլինքընը։ Ըստ Ամերիկացի բարձրաստիճան պաշտօնեային՝ հայ – ատրպէյճան խաղաղութեան համաձայնագիրը «վերջ պիտի դնէ տասնամեակներու հակամարտութեան», «հսկայական տնտեսական կարելիութիւններ պիտի ստեղծէ» տարածաշրջանին մէջ:
Հրապարակուեցաւ «Ինչո՞ւ Լեռնային Ղարաբաղի մէջ հայեր չկան» զեկոյցի ամփոփագիրը, զեկոյցը պատրաստուած է «Freedom House»ի կողմէն, որ կը փաստէ, թէ ինչպէ՛ս Արցախի բնակչութիւնը Ատրպէյճանի կողմէ միտումնաւոր կերպով ենթարկուեցաւ պարբերական յարձակումներու, շրջափակման եւ ահաբեկման, որոնց պատճառով Արցախի հայ բնակչութեան հիմնարար իրաւունքները կոպտօրէն խախտած են:
Թէ՛ Ամերիկայի պետական քարտուղարը, թէ՛ պետական քարտուղարի օգնականը կը շարունակեն կեդրոնացած մնալ Ատրպէյճանի մէջ քաղաքական բանտարկեալներու ազատ արձակելու խնդիրին վրայ, ճեպազրոյցի ժամանակ յայտարարեց Ամերիկայի փոխ խօսնակ Վետանթ Փաթել։
