Անհնարինն այն հնարավորն է, որ դեռ չի եղել․ անվասայլակից Ծաղկաձոր՝ դահուկ վարելու

«Երբ սարքով դահուկ ես քշում, վստահ ես լինում, որ գնաս Ծաղկաձոր՝ կարող ես ամենաբարձր կետից իջնել․․․ ու կարելի է մի անգամ փորձել»,- ասում է Գևորգ Կարապետյանը։ Նա դահուկը դեռ իր տանն է վարում։ Ընդ որում դա անում է ամենօրյա ռեժիմով՝ անկախ ցանկությունից ու տրամադրությունից․ գիտի՝ պետք է։ Հաստատակամությունն արդյունք է տվել։

Նախորդ տարեվերջին ամփոփված «Քայլիր, որ քայլեն» նախաձեռնության ընթացքում շուրջ 1000 մարդ միավորվեց՝ զինհաշմանդամների համար «Մետագեյթ» սարքի արտադրման գաղափարի շուրջ։ Սարքը թույլ է տալիս հաշմանդամություն ունեցող մարդկանց շարժվել՝ կանխարգելելով 30-ից ավելի հիվանդություններ։ Վերականգնողական բուժումը հաճելի դարձնող սարքն առաջին արդյունքներն է տվել։