ԱՄՆ-ում կարգելվի արհեստական բանականության կիրառումը, եթե այն կվնասի ամերիկացիների իրավունքներին և անվտանգությանը
Հինգ ամիս առաջ ԱՄՆ նախագահ Ջո Բայդենը հրամանագիր էր ստորագրել, որը կարգավորում է կառավարական հաստատություններում արհեստական ինտելեկտի մշակումն ու ներդրումը։
ԱՄՆ-ի վարչաբյուջետային գրասենյակը նախօրեին հրապարակել է իր քաղաքականությունը, որն ուղղված է դաշնային գործակալությունների և կառավարության կողմից AI-ի օգտագործումը կարգավորելուն:
Երեք հիմնական առաջնահերթություններն են՝ քաղաքացիների անվտանգությունը, նեյրոնային ցանցերի օգտագործման թափանցիկությունը և AI համակարգերի ներքին վերահսկողությունը։
«Ես հավատում եմ, որ կառավարության, քաղաքացիական հասարակության և մասնավոր հատվածի բոլոր առաջնորդները բարոյական, էթիկական և սոցիալական պարտականություն ունեն ապահովելու, որ արհեստական ինտելեկտը կիրառվի և զարգանա այնպես, որ պաշտպանի հանրությանը հնարավոր վնասներից։ Միաժամանակ, բոլորը պետք է կարողանան օգտվել դրա առավելություններից։»,- մամուլի ասուլիսում ասել է փոխնախագահ Կամալա Հարիսը։
Նա նաև հայտարարել է AI-ի օգտագործման երեք պարտադիր պահանջների մասին:
Նախ, դաշնային գործակալությունները մինչև 2024 թվականի դեկտեմբերի 1-ը պետք է համոզված լինեն, որ իրենց կողմից օգտագործվող արհեստական ինտելեկտի ցանկացած գործիք «վտանգի չի ենթարկի ամերիկացի ժողովրդի իրավունքները և անվտանգությունը»:
Հակառակ դեպքում, գործակալությունը ստիպված կլինի դադարեցնել արհեստական ինտելեկտի արտադրանքի օգտագործումը:
AI համակարգը համարվում է վտանգավոր, եթե այն «օգտագործվում է կամ ակնկալվում է, որ կօգտագործվի որոշակի գործողություններ և որոշումների արդյունքներ վերահսկելու կամ դրանց վրա էականորեն ազդելու համար»:
Դրանց թվում են.
- ընտրությունների և քվեարկության ենթակառուցվածքների ամբողջականության պահպանումը.
- ենթակառուցվածքի անվտանգության կրիտիկական գործառույթների վերահսկումը
- ինքնավար տրանսպորտային միջոցների շահագործումը
- ռոբոտների ֆիզիկական տեղաշարժերի վերահսկումը
Դաշնային գործակալություններից պահանջում է նաև թափանցիկ լինել AI համակարգերը օգտագործելիս: ԱՄՆ պետական կառույցներից պահանջվում է ամեն տարի հանրությանը հասանելի դարձնել իրենց AI համակարգերի ցանկը, այդ համակարգերի ռիսկերի գնահատումը և դրանց կառավարման մեթոդները: Եթե գաղտնիության նկատառումներից ելնելով հնարավոր չէ բացահայտել արհեստական ինտելեկտի հատուկ օգտագործման դեպքերը, ապա անհրաժեշտ է տրամադրել ամփոփ ցուցանիշներ։
Հաջորդ պահանջը արհեստական ինտելեկտի օգտագործման ներքին վերահսկողության անհրաժեշտությանն է վերաբերում։ Շատ գործակալություններից կպահանջվի ստեղծել AI կառավարման խորհուրդներ մինչև 2024 թվականի մայիսի 27-ը:
Դաշնային գործակալությունները ստիպված կլինեն աստիճանաբար հանել AI այն համակարգերը, որոնք խախտում են ամերիկացիների իրավունքները և «ձևավորել համապատասխան պաշտպանություն և վերահսկողության մեխանիզմներ, որոնք թույլ կտան օգտագործել AI-ին՝ առանց ավելորդ ռիսկեր ստեղծելու»:
