Սփյուռքում հայ դպրոց պահելը մեծ զոհողություններ է պահանջում։ Եվ այսօր սփյուռքը կանգնած է արդի կյանքին և մարտահրավերներին համապատասխան կրթական նոր մշակույթ ստեղծելու հրամայականի առջև:
Մենք աշխարհով մեկ սփռված ժողովուրդ ենք և հայեցի կրթությունն ազգային գոյության առանցքն է:
Դրա համար մենք պետք է կարողանանք սփյուռքում աճող սերնդի, երիտասարդության մեջ հայոց լեզվի նկատմամբ սեր և ակնածանք ձևավորել, խորացնել գիտելիքները, պատրաստել ժամանակի պահանջներին համապատասխան գիտելիքներով զինված սերունդ։ Ամեն ինչ սկսվում է կրթությունից և վերջանում կրթությամբ:
Համազգային հայ կրթական և մշակութային միության Մելանքթոն և Հայկ Արսլանեան Ճեմարանի տնօրենությունը հայտարարում է 7-10 տարեկան երեխաների համար արևմտահայերենով պատրաստված գիտելիքների և նյութերի՝ «Պուրակ» հարթակի մեկնարկը:
«Պուրակ»-ը ծնունդ առավ Գալուստ Գյուլբենկյան Հիմնարկության Հայկական Համայնքների Բաժանմունքի հովանավորությամբ:
Ծրագրի նպատակն է զարկ տալ արևմտահայերենի բառամթերքի ու լեզվամտածողութեան զարգացմանը և տարբերակել դասավանդվող նյութերի մատուցման եղանակները՝ էլ ավելի զարգացնելով արևմտահայերենի կենսունակությունը:
Ինչո՞ւ ստեղծվեց «Պուրակ» կրթական հարթակը։
«Դպրություն» հաղորդաշարի հյուրեն են Համազգային հայ կրթական և մշակութային միության Մելանքթոն և Հայկ Արսլանեան ճեմարանի տնօրեն Պաուլա Եղիայանը և Համազգային հայ կրթական և մշակութային միության Մելանքթոն և Հայկ Արսլանեան ճեմարանի ուսուցչուհի Շողիկ Փելթեքյանը։
