Թուրքիայի նախագահ Ռեջեփ Թայիփ Էրդողանի Ռուսաստան այցի նախապատրաստական աշխատանքները շարունակվում են, հստակ ժամկետը համաձայնեցման փուլում է, ՏԱՍՍ-ին հայտնել է Թուրքիայի ղեկավարի վարչակազմի աղբյուրը։
«Որոշակի կազմակերպչական գործընթացներ են ընթանում: Վերջնական ժամկետը դեռ հայտնի չէ: Համաձայնեցման փուլում է»,- նշել է աղբյուրը՝ անդրադառնալով սեպտեմբերի 4-ին Էրդողանի՝ Սոչի այցելելու պլանների մասին ԶԼՄ-ներում հայտնված տեղեկություններին։
Ավելի վաղ Թուրքիայում դիվանագիտական աղբյուրը ՏԱՍՍ-ին հայտնել էր, որ Սոչիում նախատեսված է Պուտինի և Էրդողանի հանդիպումը, որի հավանական ամսաթիվը կլինի սեպտեմբերի 4-ը։ Haberturk հեռուստաալիքը նույնպես սեպտեմբերի 4-ը նշում է որպես Էրդողանի Սոչի մեկնելու հավանական ամսաթիվ։
