ԿարևորՔաղաքական

Զախարովան մեկնաբանել է Փաշինյանի՝ Արցախի կարգավիճակի մասին հայտարարությունը

Ռուսաստանի համար՝ որպես Հայաստանի և Ադրբեջանի միջև կարգավորման միջնորդի, կարևոր է հասկանալ Երևանի դիրքորոշումը, ասել է ՌԴ ԱԳՆ խոսնակ Մարիա Զախարովան՝ մեկնաբանելով ՀՀ վարչապետ Նիկոլ Փաշինյանի հայտարարությունը, թե երկիրը պատրաստ է ճանաչել Ադրբեջանի տարածքային ամբողջականությունը, որում ներառված է նաև Լեռնային Ղարաբաղը։

Նիկոլ Փաշինյանը հայտարարել էր, որ Ադրբեջանի տարածքի 86,6 հազար քառակուսի կիլոմետրը, որը Երեւանը պատրաստ է ճանաչել, ներառում է Լեռնային Ղարաբաղը։ Նա հավելել էր, որ Լեռնային Ղարաբաղի հայերի իրավունքների և անվտանգության հարցը պետք է քննարկվի Բաքու-Ստեփանակերտ ձևաչափով։

«Պետության կառուցվածքի քաղաքական տեսլականի մասին նման հայտարարությունները, ամեն դեպքում, Հայաստանի և նրա ժողովրդի խնդիրն են, երկրորդ՝ ես ձեր հարցը ընդունում եմ միայն այն առումով, որ Ռուսաստանը միջնորդ է կարգավորման հարցում, և այս առումով դա իսկապես կարևոր է. այս թեմայի շուրջ ունենալ պետության, մասնավորապես՝ Հայաստանի հստակ դիրքորոշումը… Առաջ գնալու համար, այդ թվում՝ ստորագրված փաստաթղթերի վերաբերյալ, պետք է հասկանալ պետության հստակ դիրքորոշումն այս հարցում։ Այս առումով Հայաստանի վարչապետի հայտարարությունը մենք համարում ենք հաստատում այն ​​դիրքորոշման, որը նա որդեգրել է 2022 թվականի հոկտեմբերի 7-ին Պրահայի գագաթնաժողովի ժամանակ»,- ասել է Զախարովան՝ պատասխանելով լրագրողների այն հարցին, թե ինչպես են վերաբերվում Հայաստանի վարչապետի հայտարարություններին։

Նա հիշեցրել է, որ Պրահայի գագաթնաժողովի արդյունքներով Հայաստանի, Ադրբեջանի, Ֆրանսիայի և ԵՄ ղեկավարները ստորագրել են հայտարարություն, որում հղում է արվել Ալմա-Աթայիի 1991 թվականի հռչակագրին։
«Այս հռչակագրում նախկին ԽՍՀՄ հանրապետությունների միջև վարչական սահմանները ճանաչվել են միջպետական»,- հիշեցրել է Զախարովան։

Back to top button