Նոյեմբերի 15-ին Լեհաստանում Հայաստանի դեսպան Սամվել Մկրտչյանը հանդիպում է ունեցել Լեհաստանի Սեյմի արտաքին հարաբերությունների հարցերով կոմիտեի նորանշանակ նախագահ Ռադոսլավ Ֆոգիելի հետ։ Վերջինս նաև Լեհ-հայկական խորհրդարանական բարեկամության խմբի լեհական կողմի համանախագահն է։
Զրուցակցին հանգամանալից ներկայացվել են Հայաստանի շուրջ ստեղծված անվտանգային միջավայրը, սեպտեմբերի 13-14-ը ՀՀ ինքնիշխան տարածքի նկատմամբ սանձազերծված ադրբեջանական լայնամասշտաբ ագրեսիան, հայ ռազմագերիների նկատմամբ կատարված ռազմական հանցագործությունները։ Անդրադարձ է կատարվել ընթացող բանակցություններում ադրբեջանական կողմի ոչ կառուցողական, առավելապաշտական դիրքորոշմանը և այդ երկրի բարձրագույն ղեկավարության անթույլատրելի ռազմատենչ հռետորաբանությանը։
Ս․ Մկրտչյանը դրվատել է ԵՄ դիտորդական առաքելության, ինչպես նաև ԵԱՀԿ կարիքների գնահատման խմբի ներգրավումը և անհրաժեշտէ համարել ԵՄ վերոնշյալ գործունեության ժամկետի երկարաձգումը։ Նա ընդգծել է միջազգային հանրության, եվրոպական գործընկերների հստակ դիրքորոշումների արտահայտման կարևորությունը՝ կանխելու հետագա սրացումը և նպաստելու բանակցությունների համար անհրաժեշտ միջավայրի ապահովմանը։
