Հասմիկ Դիլանյան
«Ռադիոլուր»
Աշխատանքային այցով Երևանում է Եվրասիական տնտեսական հանձնաժողովի կոլեգիայի նախագահ Վիկտոր Խրիստենկոն: Այցի շրջանակներում Հայաստանի կառավարության և Եվրասիական տնտեսական հանձնաժողովի միջև հուշագիր է ստորագրվել: Հուշագրի ստորագրումից հետո Տիգրան Սարգսյանն ու Վիկտոր Խրիստենկոն հանդես են եկել համատեղ մամուլի ասուլիսով: Կողմերն արդյունավետ են գնահատել հանդիպումներն ու քննարկումները, հայտարարել որ, Հայաստանի՝ Մաքսային միությանն անդամակցելու հարցում խոչընդոտներ չկան:
Հայաստանի՝ Մաքսային միությանն անդամակցելու որոշումից մինչև ԼՂՀ հիմնահարցի լուծման ուղիներ. Եվրասիական տնտեսական հանձնաժողովի կոլեգիայի նախագահ Վիկտոր Խրիստենկոյին ուղղված հարցերի շրջանակը բավականին մեծ էր: Հուշագիրը, որը ստորագրվեց այսօր ՀՀ կառավարության ու Եվրասիական տնտեսական հանձնաժողովի կոլեգիայի միջև մեկ անգամ ևս վերահաստատեց Հայաստանի նախագահի՝ սեպտեմբերի երեքին Մոսկվայում հնչեցերած հայտարարությունը ՝ Հայաստանը ցանկանում է անդամակցել Մաքսային միությանը:
ՀՀ վարչապետ Տիգրան Սարգսյանի խոսքով՝ փորձագետների ու մասնագետների մակարդակով մեծ ծավալի աշխատանք է իրականացվել: «Մեր առջև այսօր ծառացած խնդիրն է գնահատել այն աշխատանքների ծավալը, որը մենք պետք է իրականացնենք, որպեսզի դառնանք Մաքսային միության, միասնական տնտեսական տարածքի լիարժեք անդամ: Այս խորհրդակցություններն, իհարկե, հնարավորություն են տալիս գնահատել մեր ենթակառուցվածքների, օրենսդրության պատրաստվածության մակարդակը»։
Նոր փաստաթղթերի ընդունում, համապատասխան ենթակառուցվածքների պատրաստվածությունն այն ստանադարտների համակարգին համապատասխան, որն առկա է Մաքսային միության շրջանակներում. կողմերի աշխատանքային ամենօրյա գրաֆիկն է եղել և մնալու սա այսուհետ եւ: «Այն խորհրդակցությունները, որոնք մենք այսօր անցկացրեցինք, օգնում են մեզ ճշգրիտ գնահատել, թե ինչպիսի աշխատանքներ մենք պետք է իրականացնենք և ինչպիսի ժամանակահատվածում մենք կարող ենք այն իրականացնել»,- հայտարարեց ՀՀ վարաչապետը:
Այն հուշագիրը, որը մենք այսօր ստորագրեցինք մեր նախագահների հանձնարարությամբ ինտենսիվ շփումների, տեղեկատվության փոխանակման հնարավորություն է տալիս: Դա մեզ համար առաջին հերթին մուտք է այն մեծ տեղեկատվությանը, որն այսօր առկա է Եվրասիական տնտեսական հանձնաժողովում։ «Ընդհանրապես, ցանկանում եմ գոհունակությամբ ընդգծել, որ մենք լիարժեք փոխըմբռնում ունենք բոլոր հիմնարար հարցերի շուրջ, չկան որևէ տարակարծություններ, կան միայն հարցեր, խնդիրներ, որոնք մենք պետք է համատեղ լուծենք»։
Եվրասիական տնտեսական հանձնաժողովի կոլեգիայի նախագահ Վիկտոր Խրիստենկոյի դիտարկմամբ՝ ստորագրված հուշագրի գաղափարը շատ պարզ է, «որպեսզի իրականացնենք այն մտադրությունները, այն հայտարարությունը՝ Մաքսային միության, միասնական տնտեսական տարածքին, որն արել է Հայաստանի Հանրապետությունը և որը պաշտպանել են Մաքսային միության բոլոր երկրների նախագահները.- հայտարարեց Վիկտոր Խրիստենկոն։
Եվրասիական տնտեսական հանձնաժողովի կոլեգիայի նախագահի խոսքով՝ սա կարևոր բաղադրիչ է Մաքսային միությանը, միասնական տնտեսական տարածքին Հայաստանի անդամակցության ճանապարհին: Վերջիս նաև տեղեկացրեց, որ այսօր կողմերը բարեհաջող աշխատել են նաև բարձրագույն խորհրդի որոշումների շուրջ՝ փաստաթղթերի պատրաստման գործընթացի իրականացման և ճանապարհային քարտեզի ձևավորման գործընթացի, ինչպես նաև հաջորդ գագաթաժողովի ժամանակ նախագահներին այս աշխատանքի վերաբերյալ ներկայացվելիք զեկույցի ուղղությամբ: Անդրադառնալով ԼՂՀ հիմնահարցի լուծման խնդրին՝ Եվրասիական տնտեսական հանձնաժողովի նախագահը հույս հայտնեց, որ հիմնախնդրի լուծմամբ զբաղվող փորձագետները շուտափույթ լուծումներ կգտնեն։
