Հայ ազգային կոնգրեսի` հունիսի 20-ին կայանալիք արտահերթ խորհրդարանական ընտրություններին մասնակցելու հարցը կորոշի նոր ընտրվելիք վարչությունը: Այս մասին իր ելույթում հայտարարեց Հայաստանի առաջին նախագահ Լևոն Տեր-Պետրոսյանը։
«Ինչ վերաբերում է Կոնգրեսի՝ ընտրություններին մասնակցելու կամ չմասնակցելու վճռին, ապա համագումարից խնդրում եմ, դրա իրավասությունը պատվիրակել նորընտիր վարչությանը: Եթե վարչությունը որոշի մասնակցել ընտրություններին, ապա ինքնըստինքյան հասկանալի է, որ Կոնգրեսի ցուցակը գլխավորելու եմ ես: Կոնգրեսի ներկայությունը խորհրդարանում անհրաժեշտ է թեկուզ միայն այն պատճառով, որպեսզի համատարած կակաֆոնիայի մթնոլորտում, ինչպես մեկ անգամ արդեն ասել եմ, ողջախոհության ճրագը մեր երկրում չմարի»,- հայտարարեց Լևոն Տեր-Պետրոսյանը։
«Հայ ազգային կոնգրես» կուսակցությունն այսօր համագումար է անցկացրել: Համագումարի օրակարգում առաջիկա արտահերթ ընտրություններին մասնակցել-չմասնակելու հարցն է եղել։ Ընտրվելու է նաև վարչության նոր կազմ։
Ավելի վաղ Լևոն Տեր-Պետրոսյանը ՀՀ երկրորդ և երրորդ նախագահներին առաջարկել էր հունիսի 20-ի արտահերթ ընտրություններին հանդես գալ միասնական դաշինքով:
Հայաստանում արտահերթ խորհրդարանական ընտրությունները նշանակված են հունիսի 20-ին:
