«Շուշիի Սուրբ Ղազանչեցոց եկեղեցում Պատարագ մատուցելու և հայ ուխտավորների մուտքն այնտեղ թույլատրելու շուրջ բանակցություններն արդյունք չեն տվել»,-«Ռադիոլուրին» ասել է Արցախի թեմի առաջնորդ Վրթանես եպիսկոպոս Աբրահամյանը:
Ադրբեջանական կողմի հետ բանակցել են Արցախի թեմը և ռուս խաղաղապահները: Հայ հոգևորականին, ռուս խաղաղապահ հոգևորականի ուղեկցությամբ թույլ չեն տվել նույնիսկ բարձրանալ Շուշի և դուրս բերել առաջնորդարանում մնացած թեմի արխիվը, այլ սրբություններ:
Վրթանես սրբազանը «Ռադիոլուրին» տեղեկություններ է հայտնել նաև Շուշիի Կանաչ ժամ եկեղեցու մասին: «Եկեղեցին երկու անգամ պայթեցվել է ու ամբողջությամբ ոչնչացվել»,-ասել է հոգևոր հայրը: Սուրբ Ղազանչեցոցի մասին որևէ լուր չկա. ադրբեջանական կողմն արգելում է նկարահանումները եկեղեցու տարածքում:
