Հայկական թարմ մրգին սպասում են նաեւ ԱՄՆ-ում

Մեղրիի ամենահարավային հատվածում է Իշխան Ասլանյանի այգին։ Արաքս գետի հարևանությամբ 1 հեկտարանոց այգին արդեն 10 տարեկան է։ Արքայանարնջի ծառերն ու թզենիներ տարեկան մինչեւ 10-12 միլիոն դրամի եկամուտ են բերում։ Մեղրու գինու գործարանի տարածքում Իշխանն ունի նաև արտադրամաս, որտեղ թարմ պտուղը փաթեթավորվում է և արտահանում։ Առայժմ Ռուսաստան, շուտով, հուսով է, օվկիանոսից այն կողմ։

Ոտնահետքերը մեզ տանում են մի վայր, որտեղից շատ պարզ երևում է Մայր Արաքսը, լսվում է նրա մտամոլոր ձայնը։

Սյունիքի հարավային սահմանապահ Մեղրիում ենք` Իշխան Ասլանյանի այգում։ 

«2010 թվականից եմ հիմնել այգիները, գնել եմ չորս տարբեր ֆերմերներից, որոնք չէին մշակում իրենց հողատարածքները։ Միակ ծառը, որ փրկվել է, այս թթենին է։ Ընդ որում` փրկել են հարևանները։ Դրա համար թթենին թողեցի սահմանից դուրս։ Ըստ մեր հայկական սովորության` թթենին բոլորինն է,  թթենու համար վեճ չլինի»։

Թթենին այգու սահմաններից դուրս է, իսկ մոտ 1 հա այգու ներսում կան 160 արքայանարնջի և մշտականաչ 120 և ավելի թզի ծառեր։

«Այս տարի թզի առատ տարի է Մեղրիում, շատ-շատ առատ թուզ է, այսպիսի տարի հազվագյուտ է եղել»։

Նախորդ տարիներին օրական ամենաշատը 700 կգ պտուղ էր մտնում արտադրամաս, այս տարի արդեն մեկ ու կես տոննա։ 10 տարեկան այգին Իշխան Ասլանյանին տարեկան բերում 10-12 միլիոն դրամ եկամուտ։

«Սա իտալական սորտի թզենի է, որ հիմնականում օգտվում ենք առաջին բերքից։ Մեկ կիլոգրամը մոտ 2 հազար դրամ մթերման արժեքն է, որն ավելի թանկ վերավաճառվում է արտերկրում»։

Նկատեցինք, որ թզենիները ցածր են էտված։ Իշխան Ասլանյանը բացատրեց, որ այդպես հեշտանում է բերքահավաքը։ Մեր աչքից աննկատ չմնաց նաև թզենուն մագլցած խարտյաշ աղջիկը։ 17- ամյա Արմինե Քոսյանն է, գրեթե ամեն օր արևածագը այգում է դիմավորում։ «Առավոտ ծեգին, ժամը 5։30-ին արթնանում ենք և գալիս ենք, հավաքում ենք Մեղրու քաղցրահամ թուզը, տանում արտադրամա»։

Հավաքելուց հետո սև և սպիտակ թուզը դույլով տեղափոխվում է փաթեթավորման արտադրամաս, որը գտնվում է Մեղրու գինու գործարանի տարածքում։

Իշխան Ասլանյանի ընտանիքը 20 և ավելի տոկոս բաժնեմաս ունի արտադրամասում, ամենահին շինությունը իր ուժերով է նորոգել, կարգի բերել։ 

«Փաթեթավորումները անում ենք տարբեր տեսակի` կախված պատվիրատուի պահանջներից։ Այսպիսի կեքսի թղթերով թուզը փաթեթավորվում է և ուղարկվում արտերկիր։ Բայց այսօր առավոտյան այլ գնորդ է պատվիրել մեզ և մենք փաթեթավորում ենք պլաստմասայից արկղերի մեջ է՝ առանց կեքսի թղթերի»։

2016-ից սկսվել է Ռուսաստան արտահանումը։ Իշխանն Ասլանյանն ասում է, որ թարմ պտղի պահանջարկ կա նաև ԱՄՆ-ում։

 «Չոր միրգը մենք արտահանում ենք ԱՄՆ և Արաբական Էմիրություններ, իրենք շատ են հավանել Մեղրու պտղի քաղցրությունը և հետաքրքրված են նաև թարմ մրգով։ Հիմա մտածում ենք փոխադրելու տեխնոլոգիաները ոնց գտնենք, ոնց փոխադրենք»։

Իշխան Ասլանյանը հուսով է, երբ թագավարակը նահանջի ու ճանապարհները բացվեն, թարմ պտուղը կարտահանի նաև Միացյալ Նահանգներ։