Այսօր՝ օգոստոսի 27-ին, հանդիսապետությամբ Մայր Աթոռ Սուրբ Էջմիածնի լուսարարապետ Գերաշնորհ Տ․ Հովնան եպիսկոպոս Հակոբյանի, կատարվել է Մայր Աթոռի Միածնաէջ Մայր Տաճարի զանգակատան խաչի օծման արարողությունը։
Մայր Տաճարի առջև, ըստ ընկալյալ կարգի, նախ սաղմոսների ներքո գինով և ջրով լվացվել է խաչը, ապա սուրբգրային ընթերցվածքներից ու աղոթքներից հետո Հովնան Սրբազանը և Մայր Աթոռի Վարչատնտեսական բաժնի տնօրեն Գերաշնորհ Տ․ Մուշեղ եպիսկոպոս Բաբայանը սրբալույս մյուռոնով օծել են այն։
«Խաչի Քո, Քրիստոս» շարականի երգեցողության ներքո կատարվել է խնկարկություն։ Այնուհետև ներկաների գոհաբանական մաղթանքների և շարականների երգեցողության ներքո օծված խաչը կռունկով բարձրացվել և տեղադրվել է զանգակատան գմբեթին։
