«Ամերիկայի Ձայնը» հետևել է, թե ինչպես են արձագանքել միջազգային կառույցներն ու պետությունները հայ-ադրբեջանական սահմանին ծավալվող վերջին իրադարձություններին:
Հայաստանի և Ադրբեջանի միջև սահմանին մարտական գործողությունների առնչությամբ մտահոգությամբ և կողմերին զսպվածության ու կրակի դադարեցման կոչով են հանդես եկել Կրեմլում:
«Կողմերին զսպվածության և հրադադարի ռեժիմի շրջանակում իրենց ստանձնած պարտավորությունները պահպանելու կոչ ենք անում», — ռուսաստանյան «Նովոստի» լրատվական գործակալության փոխանցմամբ՝ հայտարարել է Ռուսաստանի նախագահի խոսնակ Դմիտրի Պեսկովը:
«Ռուսաստանը պատրաստ է միջնորդական ջանքեր գործադրել կարգավորման ուղղությամբ՝ լինելով Մինսկի խմբի համանախագահ»,-ասել է Վլադիմիր Պուտինի խոսնակը:
Նույն բովանդակությամբ հանդես է եկել նաեւ Ռուսաստանի արտգործնախարարությունը նախօրեին:
«Թուրքիան իր ողջ կարողությամբ շարունակելու աջակցել եղբայրական Ադրբեջանին»,-հայտարարել է Թուրքիայի պաշտպանության նախարար Հուլուսի Աքարը թուրքական բանակի բարձրագույն հրամանատարության հետ տեսակոնֆերանսի ժամանակ:
Աքարն ասել է. «Մենք շարունակելու ենք լինել Ադրբեջանի զինված ուժերի կողքին՝ ընդդեմ Լեռնային Ղարաբաղը ապօրինաբար զավթած և տարիներ շարունակ ագրեսիվ մոտեցում դրսևորող Հայաստանի: Մենք առաջնորդվելու ենք ‘’մեկ ազգ, երկու պետություն’’ սկզբունքով»,-ասել է նա
Ինչպես ՀԱՊԿ-ի հայտարարության մեջ է ասված, այս կազմակերպության քարտուղարությունը լուրջ մտահոգություն է հայտնում հայ-ադրբեջանական սահմանին իրավիճակի սրման կապակցությամբ:
«Ստեղծված իրավիճակը չի նպաստում երկու հարևան երկրների սահմանին իրավիճակի կարգավորմանը»,-նշում է քարտուղարությունը` կոչ անելով ՀԱՊԿ-ի պատասխանատվության գոտում հրադադարի անհապաղ վերականգնում:
Հավաքական անվտանգության խորհուրդը, ՀԱՊԿ-ի արտաքին գործերի նախարարների խորհուրդն իրենց հայտարարություններում կոչ են արել կողմերին լուծել իրավիճակը բացառապես խաղաղ միջոցներով և զերծ մնալ սադրիչ գործողություններից՝ լարվածության սրումը կանխելու համար:
«Հայաստանի քաղաքացիական բնակչության անվտանգության դեմ ուղղված ագրեսիվ գործողությունները ստանալու են իրենց համարժեք պատասխանը»,-այսօր հայտարարել է ՀՀ Արտգործնախարարության խոսնակ Աննա Նաղդալյանը:
«Ադրբեջանական կողմը շարունակում է իր ագրեսիվ գործողությունները հայ-ադրբեջանական սահմանին՝ դիտավորյալ կերպով թիրախավորելով քաղաքացիական ենթակառուցվածքներն ու բնակչությանը և ընդլայնելով լարվածության աշխարհագրությունը: Այսօր հարվածային ԱԹՍ-ի միջոցով հրետակոծման է ենթարկվել Բերդ քաղաքի քաղաքացիական ենթակառուցվածքի օբյեկտները», — ասված է ԱԳՆ խոսնակի մեկնաբանությունում:
«ՀՀ քաղաքացիական բնակչության անվտանգության դեմ ուղղված այս ագրեսիվ գործողությունները ստանալու են իրենց համարժեք պատասխանը, որի ողջ պատասխանատվությունը կրում է ադրբեջանական կողմը», — ԱԳՆ լրատվության և հանրային կապերի վարչության փոխանցմամբ՝ հայտարարել է Աննա Նաղդալյանը:
Իսկ պաշտպանության նախարարության խոսնակ Շուշան Ստեփանյանն իր ֆեյսբուքյան էջում գրել է. «ՀՀ ԶՈՒ ստորաբաժանումները ոչնչացնում են Տավուշի սահմանամերձ բնակավայրերը հրետակոծած ադրբեջանական հենակետերը»:
Ինչպես ԱՄՆ-ի Պետքարտուղարության խոսնակ Մորգան Օրթագուսն է ասել, «Միացյալ Նահանգները խստագույն կերպով է դատապարտում Հայաստանի և Ադրբեջանի միջազգային սահմանին առկա բռնությունները»: Նա ավելացրել է, ասելով. «Հորդորում ենք կողմերին անմիջապես դադարեցնել ուժի կիրառումը, օգտագործել միմյանց միջև գոյություն ունեցող հաղորդակցության ուղղակի միջոցները՝ խուսափելու համար իրադրության հետագա սրումից, և խստորեն պահպանել հրադադարը»:
Օրթագուսն այս մասին գրել է Պետդեպարտամենտի պաշտոնական կայքէջում:
Կիպրոսի խորհրդարանի նախագահ Դեմետրիս Սիլուրիսը հայտնել է, որ անհանգստացած են հայ-ադրբեջանական սահմանին տեղի ունեցող բախումներով: Այս մասին խորհրդարանի նախագահը գրել է «Թվիթե»-ի իր միկրոբլոգում:
«Անհանգստացած ենք Հայաստանի և Ադրբեջանի սահմանին տեղի ունեցող զարգացումներով և նոր բախումներով: Մենք սատարում ենք հայ ժողովրդին և հուսով ենք, որ հակամարտություն կկարգավորվի բացառապես խաղաղ բանակցությունների միջոցով«»,- գրել է Սիլուրիսը:
Հայ-ադրբեջանական սահմանին անհրաժեշտ միջոցներ ձեռնարկելու ու հետագա լարումը կանխելու կոչով է հանդես եկել նաեւ ՆԱՏՕ-ն: Այս մասին «Ֆեյսբուք»-ի իր էջում գրել է Հարավային Կովկասում եւ Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցիչ Ջեյմս Ապատուրայը:
«Մենք մտահոգությամբ հետևում ենք Հայաստանի և Ադրբեջանի սահմանին զարգացումներին, որոնց ընթացքում օգտագործվում են ծանր զինատեսակներ և զոհվում են մարդիկ: Մենք միանում ենք ԵԱՀԿ Մինսկի խմբի համանախագահների կոչին՝ ուղղված բոլոր կողմերին ՝ անհրաժեշտ միջոցներ ձեռնարկել հետագա լարումը կանխելու համար», — գրել է Ապատուրայը:
Իսպանիայի Կոնգրեսի պատգամավոր Ջոն Ինյառիտուն, անդրադառնալով հայ-ադրբեջանական սահմանին Ադրբեջանի կողմից սանձազերծված գործողություններին, նշել է, որ բավ է բռնությանն ու սադրանքին: Այս մասին պատգամավորը գրել է «Թվիթեր»-ի իր էջում:
«Մինչ աշխարհը կոչ է անում երկխոսության և բանակցությունների, Ադրբեջանը նախընտրում է հարձակվել Հայաստանի վրա: Բավ է բռնությանն ու սադրանքին»,- գրել է պատգամավորը:
Բելառուսի արտգործնախարարությունը եւս դատապարտում է սկսված ռազմական գործողությունները: Հրապարակած հայտարարությամբ նախարարությունը նշում է, որ բոլոր հակամարտությունները պետք է լուծվեն բացառապես խաղաղ ճանապարհով:
