Սյունիքի մարզպետ Հունան Պողոսյանը «ԶՊՄԿ» ՓԲԸ գլխավոր տնօրենի տեղակալ, «Սյունիքի մարզի զարգացման եւ ներդրումների հիմնադրամի» հոգաբարձուների խորհրդի անդամ Թոմաս Հոֆմանի հետ այցելել է Կապանի օդանավակայան՝ ծանոթանալու վերջինիս շինաշխատանքներին եւ կառույցի վերազինման ներկա գործընթացին։
«Սյունիք օդանավակայան» ՍՊԸ տնօրեն Կարեն Վարդանյանը, շրջայցի ընթացքում ուղեկցելով այցելուներին, ծանոթացրել է շենքի գրեթե ավարտված շինարարությանը, այստեղ արդեն տեղադրված սարքավորումներին ու տեխնիկական միջոցներին։
Հյուրերը քննարկել են նաեւ կազմակերպական, կադրային, անվտանգության, ենթակառուցվածքների հետ կապված մի շարք հարցեր։
Օդանավակայանի վերաբացման ծրագրի ներդրողներն են Սյունիքի մարզի զարգացման եւ ներդրման հիմնադրամն (ՍՄԶՆՀ) ու «Զանգեզուրի պղնձամոլիբդենային կոմբինատ» բարեգործական հիմնադրամը: 2017-ի սեպտեմբերին Կապանի համայնքապետարանը օդանավակայանը 25 տարով օգտագործելու, կառավարելու, շահագործելու, սպասարկելու, վերանորոգելու եւ անհրաժեշտ բարելավում իրականացնելու իրավունք է տվել ««Սյունիք» օդանավակայան» ՍՊԸ-ին: Իրավունքը տրվել է անհատույց:
Օդանավակայանի ուղեւորային համալիրի կառուցման եւ թռիչքուղու հիմնանորոգման աշխատանքների արժեքը հաշվարկվել է 2,8 մլրդ դրամ:
