Արցախում ձևավորվեց 7-րդ գումարման խորհրդարանը: Կենտրոնական ընտրական հանձնաժողովը համապատասխան որոշումն ընդունել է այսօր: Համավարակի վտանգը հաշվի առնելով` հանձնաժողովը մանդատների հանձնման ավանդական միջոցառումը չկազմակերպեց:
Արցախի խորհրդարանը 33 պատգամավոր ունի: Մարտի 31-ին կայացած ընտրությունների արդյունքում 16 մանդատ ստացել է նորընտիր նախագահ Արայիկ Հարությունյանի «Ազատ հայրենիք» կուսակցության և «Քաղաքացիական միացյալ դաշինքի» կուսակցությունների դաշինքը:
Այսօր հրապարակված պատգամավորների ցանկից հետևում է, որ այս քաղաքական ուժի նախընտրական ցուցակն այնքան էլ փոփոխությունների չի ենթարկվել: ԿԸՀ – ստացել է երեք պատգամավորների ինքնաբացարկի դիմումը. նախօրեին տեղի ունեցած դաշինքի հավաքում որոշվել էր, թե ինչ պաշտոն են զբաղեցնելու ինքնաբացարկ ներկայացրած պատգամավորները գործադիր իշխանությունում։
Այսպես, Կարեն Դանիելյանը ղեկավարելու է նախագահի աշխատակազմը, Լուսինե Ղարախանյանը կրթության և գիտության նախարարությունը, Արամ Սարգսյանը ՝ քաղաքաշինության նախարարությունը:
Արցախի 2017 թվականի Սահմանադրության համաձայն` հանրապետության նախագահը միանձնյա է կազմավորում կառավարությունը: Դրանում տեղ կունենան այլ կուսակցությունների ներկայացուցիչներ, թե չէ ՝առայժմ հայտնի չէ: Արայիկ Հարությունյանը քաղաքական խորհրդակցությունների երկրոդ փուլը դեռևս չի սկսել: Նախագահի պաշտոնամուտը տեղի կունենա մայիսի 21-ին:
Արայիկ Հարությունյանը հայտարարել է, որ իր ծրագրի կենսագործումը սկսելու է հունիսի 1-ից, ինչը ենթադրել է տալիս, որ մինչ այդ գործադիր իշխանությունն արդեն ձևավորված է լինելու:
Բացահայտ ընդդիմադիր կեցվածքով է հանդես գալիս խորհրդարանում 3 մանդատ ստացած «Արդարություն» կուսակցությունը: Այս կուսակցությունը նախագահական ընտրություններում առաջադրել էր Վիտալի Բալասանյանի թեկնածությունը: Վերջինս գլխավորում էր կուսակցության նախընտրական ցուցակը: Վիտալի Բալասանյանը, սակայն, ինքնաբացարկ է ներկայացրել և խորհրդարան չի գնալու: 7-րդ գումարման խորհրդարանի պատգամավոր չի լինելու նաև գործող Ազգային ժողովի նախագահ Աշոտ Ղուլյանը: Նա ղեկավարում էր ժողովրդավարների ցուցակը: Այս կուսակցությունը երկու մանդատ է ստացել:
ՀՅԴ-ն Արցախի նոր խորհրդարանում կունենա 3 պատգամավոր: Դաշնակցականները նախընտրական ցուցակում փոփոխություններ չեն կատարել:
Ամենամեծ փոփոխությունները կրել է Սամվել Բաբայանի «Միասնական Հայրենիք» կուսակցության նախընտրական ցուցակը: Ինքնաբացարկի դիմում են ներկայացրել 15 թեկնածու՝ ընդ որում նաև ցուցակի առաջին տասնյակից: Կուսակցությունը 9 մանդատ ունի: Արցախի նորընտիր խորհրդարանը 7 կին պատգամավոր ունի:
