Փոքրիկ Անգելինայի ամբողջ գիշեր տևած սրտի վիրահատությունը բարեհաջող է ավարտվել՝ շնորհիվ Նորք-Մարաշ ԲԿ սրտային վիրաբույժներ Հրայր Հովակիմյանի և Գագիկ Հեբոյանի և ամբողջ բժշկական անձնակազմի։ Այդ մասին Ֆեյսբուքի էջում գրել է Առողջապահության նախարար Արսեն Թորոսյանը:
«Սա մի մեծ քայլ էր հայկական սրտային վիրաբուժության համար և կյանքը փրկելու անփոխարինելի հույս Անգելինայի համար։ Բժիշկները շարունակում են ամեն ինչ անել, որ երեխան հաղթահարի բոլոր առողջական խնդիրները։
Շնորհակալություն բոլորին, ով իր լուման ներդրեց այս վեհ գործում»,- գրել է նախարարը։
Նախօրեին նախարարը տեղեկացրել էր, որ հանգանակությամբ հավաքվել է փոքրիկ Անգելինայի սրտի վիրահատության գումարի 70%-ը, իսկ անհրաժեշտ մյուս մասը 30.000$-ը իր հրամանով կտրվի պետական բյուջեից։
«Նման վիրահատություն Հայաստանում կատարվելու է առաջին անգամ»,- գրել էր նա։
