Լեռնապատ համայնքի «Երկրաշարժի հետևանքով անօթևան մնացած ընտանիքների բնակապահովման ծրագրի» շահառու հանդիսացող թվով 32 ընտանիք փետրվարի 20-ին անձամբ Լոռու մարզպետ Անդրեյ Ղուկասյանի ձեռքից ստացել են Բնակարանների գնման իրենց վկայագրերը (ԲԳՎ), որը նրանց հնարավորություն կտա այսօրվանից սկսած 6 ամսվա ընթացքում բնակարան ձեռքբերել:
Նախորդ տարեվերջին ՀՀ կառավարության որոշմամբ Լոռու մարզին հատկացված 674 մլն 782 հազ. դրամի շրջանակներում ԲԳՎ-ներ կհաձնվեն ծրագրի շահառու հանդիսացող ընդհանուր թվով 121 ընտանիքի, որոնք 2019թ. իրականացված հարցումների արդյունքում նախընտրել էին վկայագրերի միջոցով բնակարանների ձեռքբերման տարբերակը:
Մարզպետը, շնորհավորելով ընտանիքներին, ափսոսանք է հայտնել, որ սեփական հարկ ունենալու այս մեծ ուրախությունը նրանք վայելում են այսքան տարիներ անց միայն:
— Ներկայիս իշխանությունը, ՀՀ վարչապետի գլխավորությամբ, անթույլատրելի համարելով ստեղծված իրավիճակը, այս փոքր ժամանակահատվածում մեծածավալ աշխատանք է կատարել նաև երկրաշարժի հետևանքով բնակարան կորցրած ընտանիքների խնդիրների լուծման ուղղությամբ: Մենք վճռական ենք այս հարցում և մեր ուղին անկասելի է,- ասել է Անդրեյ Ղուկասյանը:
Ինչպես նշել է մարզի ղեկավարը, Լեռնապատում ԲԳՎ-ների միջոցով բնակարաններ ձեռքբերելու տարբերակը նախընտրել է ընդհանուր թվով 55 ընտանիք: Նախորդ տարի, դարձյալ պետբյուջեից հատկացված միջոցներով ՀՀ քաղաքաշինական կոմիտե-Լոռու մարզպետարան և «Ֆուլլեր տնաշինական կենտրոն» համագործակցությամբ այստեղ ծրագրի շահառու հանդիսացող 3 ընտանիքի համար կառուցվել են բնակելի տներ, 6-ն ընթացքի մեջ են:
Եվս 36 ընտանիք, որոնք նախընտրել են դարձյալ բնակելի տների կառուցման տարբերակը, սպասում են իրենց բնակարանամուտին, որը մարզպետի հավաստմամբ, հնարավոր կլինի եթե ոչ այս, ապա հաջորդ տարի՝ անպայման:
