ԵԱՀԿ գործող նախագահ, Սլովակիայի արտաքին և եվրոպական գործերի նախարար Միրոսլավ Լայչակը և ԵԱՀԿ Մինսկի խմբի համանախագահները ( Իգոր Պոպովը (ՌԴ), Ստեֆան Վիսկոնտին (Ֆրանսիա), Էնդրյու Շոֆերը (ԱՄՆ)) Բրատիսլավայում քննարկել են ղարաբաղյան հակամարտության կարգավորմանն առնչվող հարցեր`հայտնում է Սլովակիայի ԱԳՆ-ն: Հանդիպմանը մասնակցել է նաև ԵԱՀԿ գործող նախագահի անձնական ներկայացուցիչ Անջեյ Կասպրշիկը:
Լայչակը գոհունակություն է հայտնել, որ ԵԱՀԿ Մինսկի խմբի համանախագահները հակամարտության կողմերի հետ միասին շարունակել են լարվածության հետագա նվազմանն ու խաղաղությանը նպաստող մթնոլոտի ստեղծմանն ուղղված միջոցների քննարկումը: Ըստ Լայչակի, Սլովակիան, որպես ԵԱՀԿ նախագահ, առաջիկայում ևս իր նպաստը կբերի այդ հարցում:
Հանդիպմանը նաև քննարկվել է նախապատրաստումը դեկտեմբերի 5-6-ին Բրատիսլավայում կայանալիք ԵԱՀԿ ԱԳՆԽ նիստին:
