Լուսինե Ավանեսյան
«Ռադիոլուր»
Արցախի խորհրդարանն այսօր լիագումար նիստում քննարկեց մայր օրենքում փոփոխությունների հարցը: Այս տարվա հունիս-հուլիս ամիսներին քաղաքացիական նախաձեռնող խումբը ստորագրահավաք էր սկսել՝ Սահմանադրության 48-րդ հոդվածի փոփոխության հարցով և ավելի քան 19 հազար ստորագրությամբ հարցը ներկայացվել էր Ազգային ժողով: Առաջարկվող փոփոխությունները հնարավորություն պետք է տային Արցախի նախագահ և Ազգային ժողովի պատգամավոր ընտրվել նաև ՀՀ քաղաքացիներին: Խորհրդարանն այսօր քննարկեց ու մերժեց համապատասխան նախագիծը:
Խորհրդարանի այսօրվա նիստին 33-ից ներկա էին 30 պատգամավորներ: Նրանցից միայն 4-ը կողմ արտահայտվեց Սահմանադրական փոփոխություններին:
Կողմ քվեարկող Շարժում 88 խմբակցության պատգամավոր Գագիկ Բաղունցի վերաբերյալ նախաձեռնող խումբը ՀՀ ոստիկանությունից փաստաթուղթ է հրապարակել ֆեյսբուքում՝ պատգամավորին և նրա գործընկերներին համոզելու համար, որ նրանք միայն ԱՀ քաղաքացիներ չեն, այլև Հայաստանի: Ըստ նախաձեռնող խմբի ղեկավար Վլադիմիր Պողոսյանի՝ որևէ մեկը Արցախում միայն ԱՀ քաղաքացի չէ:
Խորհրդարանը մեծամասնությամբ այս և նախաձեռնող խմբի մյուս պնդումներում վտանգներ տեսավ ու դեմ քվեարկեց: Նախագիծը հանվեց շրջանառությունից: Իրենց հետագա քայլերի մասին նախաձեռնող խմբի ղեկավար Վլադիմիր Պողոսյանը «Ռադիոլուր»-ին ասաց՝ քանի որ արդեն ձեւավորվել է Միասնական հայրենիք կուսակցությունը՝ հարցը կքննարկեն քաղխորհրդի նիստում:
Սահմանադրական փոփոխությունների նախաձեռնող խմբի անդամներից մեկը՝ Արցախի հերոս, պաշտպանության նախկին նախարար Սամվել Բաբայանն է: Եվ չնայած հերքումներին՝ նախագիծը ընկալվում էր որպես Սամվել Բաբայանի իշխանության գալու հնարավորություն: Սամվել Բաբայանը Միասնական Հայրենքի կուսակցության նախագահն է:
