Հասմիկ Դիլանյան
«Ռադիոլուր»
Հանրային հեռուստառադիոընկերության խորհուրդը հայաստանյան եզակի կառույցներից է, որը կապիտալ ծախսերը պատշաճ է կատարել, խորհրդարանում՝ հայտարարել է ԱԺ ֆինանսավարկային ու բյուջետային հարցերի մշտական հանձնաժողովի նախագահ Մանե Թանդիլյանը:
Հանրային հեռուստառադիոընկերության խորհրդի նախագահ Արա Շիրինյանն այսօր խորհրդարանում ներկայացրել է հաջորդ տարվա ֆինանսական հատկացումների մասին տեղեկատվությունը: Հանրային հեռուստառադիոընկերության խորհրդի նախագահը հայտարարել է, որ հաջորդ տարի Հանրային ռադիոյին տրվող ֆինանսական հատկացումները չեն ավելանա:
Արա Շիրինյանը տեղեկացրել է, որ այս տարի ռադիոդաշտը կավելանա երկու հանրային ալիքով: «Մենք ունեինք մեկ հանրային ռադիոալիք՝ առաջին ալիքը, նաև մի կապուղի՝ 103.8, որը երիտասարդական հաղորդումներ էր տալիս: Սա փաստորեն մասնավոր կազմակերպությունն էր գործարկում: Այս տարի ամբողջությամբ այն ստեղծում և գործարկում է Հանրային ռադիոն: Այս նպատակով բյուջեից նոր ծախսեր նախատեսված չեն: Մինչև տարեվերջ մենք կունենանք ևս մեկ հանրային ալիք՝ ռադիոյում՝ մանկական ալիքը: Նախատեսում ենք, որ հաջորդ տարվա սկզբից կգործի նաև «Ոսկե ֆոնդը»»:
Հանրային հեռուստառադիոընկերության խորհրդի նախագահը տեղեկացրել է, որ երկու նոր ալիքներն արդեն գործում են ինտերնետում, Հանրային ռադիոյի պաշտոնական կայքում հեռարձակվում են: «Մենք դիմել ենք հեռուստատեսության և ռադիոյի հանձնաժողով, պարոն Հակոբյանը խոստացել է, որ մինչև տարեվերջ երկու կապուղի կունենանք: Բովանդակություն կա, դրա համար մենք լրացուցիչ միջոցներ բյուջեից չենք ուզել: Մնում է, որ տեխնիկապես երկու կոճակ ավելանա»,- տեղեկացրել է Հանրային հեռուստառադիոընկերության խորհրդինախագահ Արա Շիրինյանը:
