Գանձասարի վանական համալիրում կիրակի ՀՀ զինված ուժերի հոգևոր առաջնորդ Վրթանես եպիսկոպոս Աբրահամյանը Գանձասարի վանական համալիրում պատարագ է մատուցել՝ նվիրված Արցախի թեմի վերաբացման 30-ամյակին:
Արցախի թեմի վերաբացման 30-ամյակի առթիվ շնորհավորական ուղերձ է հղել Ամենայն հայոց կաթողիկոս Գարեգին Բ-ն: Պատարագից հետո այն ընթերցել է Վրթանես եպիսկոպոս Աբրահամյանը:
Ուղերձում մասնավորապես ասված է. «Մենք գոհությամբ ենք հաստատում, որ արցախահայության հերոսական պայքարը, ստեղծագործ կյանքի ողջ ընթացքը զարդարված են սրբատեղերի հանդեպ մեծ հոգածությամբ ու նվիրումով: Դրա վառ ապացույցը, անցած երեք տասնամյակներում շուրջ 90 եկեղեցիների ու վանքերի նորոգումն ու կառուցումն է: Արցախի թեմի վերաբացման 30-ամյակի կապակցությամբ հայրապետական մեր օրհնությունն ենք բերում Արցախի թեմի առաջնորդ Պարգև Արքեպիսկոպոս Մարտիրոսյանին, հոգևոր դասի ներկայացուցիչներին, ինչպես նաև մեր գնահատանքն ենք հայտնում Արցախի նախկին և ներկայիս իշխանություններին, ովքեր իրենց ներդրումն են բերել Արցախի հոգևոր կյանքում»:
Ամենայն հայոց կաթողիկոս Գարեգին Բ-ի կողմից Արցախի թեմի առաջնորդ Պարգև Արքեպիսկոպոս Մարտիրոսյանին բազմամյա ծառայության և ձեռբերումների համար շնորհվել է Հայաստանյայց Առաքելական Սուրբ եկեղեցու «Սուրբ Ներսես Շնորհալի» շքանշան:
«Արցախպրես»-ի թղթակցի հետ զրույցում Արցախի թեմի առաջնորդ Պարգև Արքեպիսկոպոս Մարտիրոսյանն ասել է, որ Արցախի թեմի վերաբացումը հայ ժողովրդի առաջին նվաճումն էր:
«Այնուհետև ունեցանք անկախ պետականություն և ստեղծեցինք բանակ: Արցախի թեմի վերաբացումով մենք հոգևոր մեծագույն ձեռքբերում ունեցանք: Մեր գլխավոր անելիքը Գանձասարի վանական համալիրի օծումն էր և Արցախի ժողովրդի հոգիներում Քրիստոսի ավետարանը քարոզելը, ինչն էլ մինչև այսօր շարունակում ենք»,-ավելացրել է Արցախի թեմի առաջնորդը՝ ընդգծելով, որ ամենակարևոր ձեռքբերումն Արցախի ազատությունն է:
Պատարագին ներկա են եղել ԱՀ նախագահ Բակո Սահակյանը, ԱՀ Ազգային ժողովի նախագահ Աշոտ Ղուլյանը, պետնախարար Գրիգորի Մարտիրոսյանը, պետական այլ այրեր, հոգևոր դասի ներկայացուցիչներ:
