Այսօր Երեւանում տեղի է ունցել քայլերթ՝ ընդդեմ Ամուլսարի շահագործման։ Բողոքի ակցիայի մասնակիցները կառավարության շենքի առջեւ ավարտեցին բնապահպանական ակցիան։
Այն կազմակերպել էր Հայկական բնապահպանական ճակատը։ Բողոք-երթը մեկնարկել էր ԱԺ-ից, անցել Մաշտոց-Ամիրյան պողոտաներով։
ՀՀ վարչապետ Նիկոլ Փաշինյանը «Ֆեյսբուք»-ի ուղիղ եթերում խնդրել էր Ջերմուկ քաղաքի բնակիչներին ապաշրջափակել Ամուլսարի հանք տանող ճանապարհները: Նա խոստացել էր, որ եթե հիմա նույնիսկ դեպի Ամուլսար տանող ճանապարհները բացվեն, այնտեղ շինարարական աշխատանքները չեն մեկնարկի մինչև 2020 թվականի ապրիլ:
Այսօր ավելի վաղ հայտնել էինք, որ խորհրդարանում ԱԺ-կառավարություն հարցուպատասխանի ժամանակ վարչապետ Նիկոլ Փաշինյանը, պատասխանելով պատգամավոր Արման Բաբաջանյանի հարցին, իր դիրքորոշումն էր հայտնել Ամուլսարի վերաբերյալ։
«Ամուլսարի հարցում հետամուտ ենք լինելու ճշմարտությանը, իսկ ճշմարտությունը Հայաստանի պետական շահն է»,- ասել էր վարչապետը։
