Լուսինե Վասիլյան
«Ռադիոլուր»
«Իմ քայլը» խմբակցությունն այսօր նիստ է հրավիրել, որին մասնակցել են վարչապետ Նիկոլ Փաշինյանը և փոխվարչապետ Տիգրան Ավինյանը:
Շուրջ երկու ժամ տևած հանդիպման ընթացքում քննարկվել է միայն Ամուլսարի հանքի շահագործման հարցը՝ հանդիպումից հետո լրագրողներին ասել է ԱԺ փոխնախագահ Ալեն Սիմոնյանը, նշել, որ որևէ որոշում չի կայացվել, եղել է աշխատանքային քննարկում:
Վարչապետը ներկայացրել է իրավիճակը, նրան հարցեր են ուղղվել, քննարկումն, ըստ Ալեն Սիմոնյանի, անցել է համերաշխ մթնոլորտում:
«Հանրության մեջ կան բազմաթիվ մարդիկ, որոնք դեմ են, կան բազմաթիվ մարդիկ էլ, որոնք կողմ են: Այս քննարկումները հենց նրա համար են, որ լսենք ու ճիշտ որոշումներ կայացնենք: Սա ուղղակի աշխատանքային քննարկում է մեկ նպատակի համար, որ հանրությանը և ինքներս մեզ պարզաբանենք, թե որոշումն է ամենաճիշտը»:
Ալեն Սիմոնյանը հերքել է տեղեկությունը, թե խմբակցության նիստի ժամանակ քննարկվել է նաև ՍԴ որոշումը: Որևէ անդրադարձ դրան չի եղել ՝ ասել է ԱԺ փոխնախագահը:
