Այսօր առավոտյան փակ էր Երևան-Արմավիր միջպետական ճանապարհը: Մարզի Գեղակերտ համայնքի բնակիչներն էին իրենց բողոքի ձայնը բարձրացնում: Նրանց պահանջը հստակ է.
«Ճանապարհը չի բացվելու, մինչև մեր խնդրին լուծում չտան: Արդեն 20 օր է՝ համայնքը ոռոգման ջուր չունի, որևէ բացատրություն չկա, թե ինչու են ամառվա ընթացքում մեզ զրկել ոռոգման ջրից»:
Մինչև գյուղատնտեսության նախարար Արթուր Խաչատրյանը կամ Տարածքային կառավարման և զարգացման նախարար Սուրեն Պապիկյանը չգնան համայնք և խնդրին լուծում չտան, ճանապարհը չի բացվելու:
«Այստեղ են ոստիկանության ծառայողներ, մարդիկ, ովքեր հորդորում են բացել ճանապարհը, բայց ճանապարհը չի բացվելու, մինչև համայնքը ոռոգման ջուր չունենա»,- ասաց բնակիչը:
Ճանապարտը մոտ երեք ժամ հետո բացվեց։ Գեղակերտի համայնքապետ Սերյոժա Առաքելյանը «Ռադիոլուրին» փոխանցեց՝ ճանապարհը բաց է, սակայն՝ մինչև վաղը: Այն բացվել է ոռոգնման ջուր տալու խոստումից հետո:
Համայնքի ղեկավարը պարզաբանեց՝ ջրի խնդիրը սրվել է հատկապես այս շրջանում, քանի որ ելակի սածիլման ժամանակն է:
Ոռոգման համակարգում խնդիրները ջրի պես շատ են՝ ասում է գյուղատնտեսության նախարար Արթուր Խաչատրյանը:
Հայաստանում մակերևութային ջրերը տարեկան 7-8 մլրդ խորանարդ լիտր են կազմում: Ամբարվում է, սակայն 2 մլրդից ոչ ավելի: Ջրառի ու ջրտուքի միջև նույնպես խնդիր կա: Սևանա լճից վերցված լրացուցիչ ջուրը կուղղվի Կոտայքի մարզի ոռոգման ջրի խնդիրները լուծելուն՝ տեղեկացրեց նախարարը:
Ոռոգման ջրի խնդիրը մեղմելու համար էր, որ օրերս խորհրդարանը որոշեց Սևանա լճից լրացուցիչ մինչև 40 մլն խորանարդ մետր ջրառի թույլտվություն տալ: Վերջին օրերին հենց այս թեման էր ամենաշատը քննարկվում:
Բնապահպաններն ու փորձագետները բարձրաձայնում են, որ սա վտանգավոր է լինելու լճի համար: Կառավարությունում փորձում են հասկանալ՝ ինչպես է մեր երկրում առաջանում ոռոգման ջրի պահանջարկը:
Իրավասուները խոստանում են՝ կանեն ամեն ինչ, որպեսզի ծախսվող ամեն մի խորանարդ մետր ջրի օգտագործումը հասցեական լինի:
