Հին ու ինքնատիպ մշակույթով հայտի 2018-ի ԱՊՀ մշակութային մայրաքաղաք Գորիսը զերծ չէ նաև մշակութային խնդիրներից: Վաղնջական ժամանակներից մեզ հասած Հին Գորիսի քարանձավային ամֆիթատրոնի կողքին այսօր խորհրդային տարիներին կառուցված Վաղարշ Վաղարշյանի անվան պետական դրամատիկական թատրոնն է՝ տասնամյակների չլուծված խնդիրներով՝ հանրային ընկալումից մինչև շենքային պայմաններ:
<<Գորիսը՝ 2018-ի ԱՊՀ մշակութային մայրաքաղաք>> միջոցառումների շրջանակում ԱՊՀ տարբեր երկրներից Գորիս ժամանած շուրջ 150 պատվիրակներին զարմացրել էր հատկապես Հին Գորիսի քարանձավներից մեկը, որը, ինչպես ներկայացնում էին տեղացիները, տարածաշրջանի հնագույն թատրոնն է: Որքա՞ն են հիմնավոր տեղացիների պնդումները քարանձավային ամֆիթատրոնի մասին։
Զրուցում ենք արդեն ոչ քարանձավային, Գորիսի Վաղարշ Վաղարշյանի անվան պետական դրամատիկական թատրոնի տնօրեն Շանթ Հովհաննիսյանի հետ։ <<Թատրոնն այստեղ եղել է վաղնջական ժամանակներից, դրա մասին գրել են Սերո Խանզադյանը, պատմաբաններ: Թիվ, ցավոք, չեմ կարող նշել>>,- ասում է:
Ի տարբերություն քարանձավային թատրոնի, հայտնի է Գորիսի համեմատաբար ավելի նոր թատրոնի ստեղծման տարեթիվը: Իհարկե, նոր ասվածն այս դեպքում պարզապես հարաբերական է: 1938 թվականին կառուցված Վաղարշ Վաղարշյանի անվան թատրոնն այսօր համարվում է հին, հին իր խնդիրներով, տասնամյակներ շարունակ կուտակված խնդիրներով: Թատրոնն ավելի քան մեկ տարի ղեկավարում է հանրապետության վաստակավոր արտիստ Շանթ Հովհաննիսյանը՝ շատերին հայտնի «Գարեգին Նժդեհ» ֆիլմից: Նոր տնօրեն, նոր ծրագրեր, թատրոնի զարգացման նոր հեռանկարներ, բայց նաև ժառանգություն ստացած բազմաթիվ խնդիրներ, որոնց մեծ մասն առ այսօր լուծում չեն ստացել։
<<Թատրոնը նաև հաստիքներ խնդիր ունի: Աղքատիկ է հատկապես դերասանական կազմը։ Եթե դերասանուհիներից մեկը, օրինակ, ամուսնանա ու երեխա ունենա, կխաթարվի ամբողջ ստեղծագործական գործընթացը>>,- ասում է տնօրենը: Գորիսի թատրոնի առանցքային խնդիրն այս պահին շենքային պայմաններն են: <<Ռադիոլուրի>> հետ զրույցում թատրոնի աշխատակիցներից մեկն այսպիսի կարծիք հայտնեց. <<Հսկայական բերդ հիշեցնող այս շենքը թատրոնի համար շատ անհարմար; Ավելի փոքր ու հարմարավետ տարածքում մեր աշխատանքն ավելի արդյունավետ կարելի էր կազմակերպել>>: Տեսակետի հետ համաձայն է նաև Շանթ Հովհաննիսյանը։
Գորիսի թատրոնն այս պահին մասնակի վերանորոգման փուլում է: Ճեմասրահն է վերանորոգվում՝ խորհրդային ժամանակներից ի վեր առաջին անգամ: <<Թատրոնի սուղ միջոցներով փորձում ենք պատշաճ տեսքի բերել սանհանգույցն ու հարդասենյակները, ստեղծել տանելի պայմաններ ստեղծագործական աշխատանքի համար>>,- ասում է թատրոնի տնօրեն Շանթ Հովհաննիսյանը:
Տնօրենի խոսքով, ծրագրեր կան, բայց դրանք իրականացնելու համար նաև ֆինանսներ են պետք: Տեղական ներդրողներն առայժմ չեն շտապում օգնել: Նրանց կողմից թատրոնն առայժմ չի ընկալվում որպես արդյունավետ ներդրման միջավայր: Այդ գիտակցության ձևավորման համար էլ, ըստ զրուցակցիս, գուցե ժամանակ է անհրաժեշտ:
