Երևանի քաղաքապետի արտահերթ ընտրությունը այսօր տեղի չունեցավ՝ քվորում չլինելու պատճառով։
Նիստին ներկա էր ավագանում ընդամենը 5 անդամ՝ «Երկիր Ծիրանի» խմբակցության 3 անդամներ, անկախ ավագանու անդամ Հայկ Պետրոսյանը և փոխքաղաքապետ Կամո Արեյանը:
Առաջադրված միակ թեկնածուն Երկիր Ծիրանի խմբակցության ղեկավար Զարուհի Փոստանջյանն էր:
Ազատամարտիկ Վոլոդյա Ավետիսյանը մի խումբ համակիրների հետ եկել էր Երևանի քաղաքապետարան:Այս անգամ ոչ թե բողոքի ակցիա իրականացնելու,այլ քաղաքապետի թեկնածու Զարուհի Փոստանջյանին աջակցելու համար: Նրանք պարզել էի Փոստանջյանի դիմանկարով պաստառներ ու վանկարկում էին քաղաքապետի իրենց թեկնածուի անունը:
Իսկ արդեն քաղաքապետարանի նիստերի դահլիճում Զարուհի Փոստնջյանի թեկնածությունը չքննարկվեց։ Քվորում չկա, գրեթե դատարկ դահլիճում հայտարարարեց փոխքաղաքապետ Կամո Արեյանը:
Հայտարարված 30 րոպե ընդմիջումից պատկերը դարձյալ նույն էր: Դահլիճում 65 անդամներից ներկա էին հինգը։ Քաղաքապետի միակ թեկնածուն Զարուհի Փոստանջյանն էր, ասաց, որ իր առաջադրման պաշտոնական գրությունը մուտք էր քաղաքապետարան դեռ անցած շաբաթ: Զարուհին ասում է, որ իր համար կանխատեսելի էր նման արդյունքը, իրենց նպատակը արտահերթ ընտրությունների անցկացումն է:
Ինչու ԵԼՔ խմբակցությունը որոշեց թեկնածու չառաջադրել և նիստին էլ չմասնակցել: Խմբակցության ղեկավար Դավիթ Խաժակյանն ասում է՝ այս ավագանին պետք է լուծարվի և լինեն նոր ընտրություններ:
«Մենք հանգեցինք նրան, որ շատ ավելի ճիշտ կլինի ստեղծված իրավիճակում հանգուցալուծումը տան Երևանի բնակիչները, և ավագանու արտահերթ ընտրությունների միջոցով որևէ ուժին տալով մեծամասնություն՝ որոշեն, թե ով է լինելու քաղաքապետը»,- նշել է Խաժակյանը:
Խաժակյանն ասաց, որ արտահերթ ընտրությունների է գնում քաղաքային իշխանությունը վերցնելու համար։
Ավագանու Հանրապետական խմբակցությունը հանդես էր եկել հայտարարությամբ, որ ստեղծված իրավիճակում Երևան քաղաքի հետագա բնականոն և շարունակական զարգացումը ապահովելու նպատակով նոր քաղաքապետին և ավագանու անդամներին պետք է ընտրեն մայրաքաղաքի բնակիչները։ Մասնակցելո՞ւ է արդյոք եւ եթե այո ինչ արդյունքներ է ակնկալում քաղաքային արտահերթ ընտրություններում ՀՀԿ- ն։ Հարցի պատասխանը խմբակցությանն անդամներից ստանալ չհաջողվեց։
Այսպիսով՝ կառավարությունը, ավագանու արձակումից երկու շաբաթվա ընթացքում հնարավորություն է ունենալու նշանակել արտահերթ ընտրության օր։ Առավելագույն ժամկետներով առաջնորդվելով՝ դա տեղի է ունենում սեպտեմբերի առաջին կեսին:
