«Լրագրողներ առանց սահմանների» կազմակերպությունը մտահոգություն է հայտնել Հայաստանում մամուլի ազատությունը սահմանափակող քայլերի առնչությամբ:
Կազմակերպությանը մտահոգել են հատկապես վերջին օրենսդրական փոփոխությունները, որոնցով գործադիրի նիստերը դառնում են դռնփակ, փոխվում է Երևանի ավագանու նիստերի լուսաբանման ձևաչափը:
Լրագրողական կազմակերպությունների մտահոգությունները կարող են լրացվել ևս մեկով՝ ապրիլի 9-ի գլխավոր քաղաքական իրադարձությանը՝ Հայաստանի 4-րդ նախագահ Արմեն Սարգսյանի երդմնակալության արարողությանը, լրագրողները չեն մասնակցի:
Հայաստանի 4-րդ նախագահ Արմեն Սարգսյանի երդմնակալության արարողությանը, լրագրողները կհետևեն ինտերնետային հեռարձակման միջոցով, խորհրդարանից: ԱԺ լրատվության և հանրության հետ կապերի վարչությունը պարզաբանում է, որ այլ դեպքերում էլ լրագրողները ԱԺ նիստերի դահլիճ մուտք գործելու իրավունք չունեն և դրանց հետևում են առանձնացված սրահներից։ Նույն սկզբունքով կկազմակերպվի նաև ապրիլի 9-ի հատուկ նիստի լուսաբանումը, պարզապես լրագրողները դրան կհետևեն ոչ թե համալիրից, այլ Ազգային ժողովից:
Լրագրողական կազմակերպությունների կարծիքով՝ սա լրագրողների աշխատանքը սահմանափակող հերթական քայլերից մեկն է: Սրան նախորդել են մի քանի օրեսնդրական փոփոխություններ, որոնք նույնպես մտահոգությունների առիթ են դարձել: Կառավարության նիստերը փակ անցկացնելու, Երևանի ավագանու նիստերին հեռակա կարգով հետևելու օրենսդրական փոփոխությունները գրավել են նաև լրագրողական միջազգային կառույցների ուշադրությունը:
«Լրագրողներ առանց սահմանների» կազմակերպությունը մտահոգություն է հայտնել Հայաստանում մամուլի ազատությունը սահմանափակող օրենսդրական փոփոխությունների առնչությամբ: Կազմակերպության Արևելյան Եվրոպայի և Կենտրոնական Ասիայի բաժնի ղեկավարը սա Հայաստանում մամուլի ազատության նվազման միտում է որակում, կոչ է անում խորհրդարանին վերանայել այն օրենսդրական փոփոխությունները, որոնք սահմանափակում են տեղեկատվության մատչելիության իրավունքը:
«Լրագրողներ առանց սահմանների» կազմակերպությանը մտահոգել է մարտի 23-ին Ազգային ժողովի կողմից ընդունված օրենսդրական փոփոխությունը, որի համաձայն կառավարության նիստերն այսուհետ դռնափակ կանցկացվեն: Իրավապաշտպան կազմակերպությունը շեշտում է, որ այս փոփոխությունները չեն քննարկվել լրագրողական համայնքի հետ: Մտահոգությունը կիսում են նաև տեղական կազմակերպությունները:
Մարդու իրավունքների պաշտպան Արման Թաթոյանին նույնպես մտահոգում է վերջին շրջանում նկատվող միտումը՝ լրագրողը սկսել է ընկալվել որպես բարիկադի հակառակ կողմում կանգնած մեկը:
Իսկ օրենսդրական փոփոխությունների հեղինակները մտահոգվելու լուրջ առիթներ չեն տեսնում: Մասնավորապես կառավարության նիստերը դռնփակ անցկացնելու առաջարկի հեղինակ արդարադատության նախարար Դավիթ Հարությունյանը կառավարության վերջին բաց նիստից հետո հայտարարեց՝ մտափոխվելու խնդիր չի տեսնում:
Հայաստանի 4-րդ նախագահի երդմնակալության արարողոությունն ուղիղ չլուսաբանելու մտահոգություններն ԱԺ-ից փարատում են նաև այն հիշեցմամբ, որ այս անգամ լրատվամիջոցների մասնակցության այլ ֆորմատ էլ կգործի: Արմեն Սարգսյանի երդմնակալությանը ներկա գտնվելու հնարավորություն կունենա շուրջ 50 լրատվամիջոցի ղեկավար:
