Սեռական բռնությունների դեպքերի մեծ մասը անչափահասների դեմ է

Քննչական կոմիտեի տվյալների համաձայն՝  2017 թվականին  քննված սեռական բնույթի 161 հանցագործություններից 110-ը երեխաների նկատմամբ է եղել։

Երեխաների հիմնահարցերով զբաղվող «Համահայկական  ծնողական կոմիտե» հասարակական կազմակերպության նախագահ Արման Բոշյանը ներկայացրել է խնդրի պատճառները:

Իսկ քննչական կոմիտեն հայտարարել հանցագործությունը բացահայտելուն ուղղված իրենց քայլերը:

 

Սովորաբար հոգեբանները սթրեսի ենթարկվածին խորհուրդ են տալիս բարձրաձայնել իրենց խնդիրը, փորձել նաև այդ կերպ թոթափել ցավը: Սակայն Հայաստանում դեռևս սեռական բռնության ենթարկվածները չեն կարողանում խոսել իրենց հետ կատարվածի մասին:

Ամեն անգամ նոր սթրես են ապրում՝ «Ռադիոլուրին» ասում է Սեռական բռնության ճգնաժամային կենտրոնի շահերի պաշտպանության մասնագետ Աննա Հովհաննիսյանը: Բռնության զոհերը շարունակում են ամոթի զգացում ապրել, հատկապես երբ խոսքը աղջիկ երեխաների մասին է, ասում է:

«Աղջիկ երեխայի հետագա պատվի, կամ ընտանիքի հետագա  պատվի: «բարոյական արժեքները» պահպանելու նպատակով»:  

Անչափահասների նկատմամբ սեռական բռնության դեպքերով կենտրոնի աջակցությանը հիմնականում դիմում են  իրավապահների միջնորդությամբ: Քննչական կոմիտեի հրապարակած տվյալների համաձայն` սեռական ոտնձգությունների զոհերը հիմնականում երեխաներն են:

Քննչական կոմիտեի նախագահ Աղվան Հովսեփյանը վերջերս «Անչափահասների մասնակցությամբ հանցագործությունների քննությունը» թեմայով միջազգային կոնֆերանսի ընթացքում  նշել է, որ պետք է  անչափահասների մասնակցությամբ հանցագործությունները նվազեցնելուն ուղղված քայլեր ձեռնարկեն:

«Այս ժամանակահատվածում, որի  մեջ մենք  ապրում ենք  գլոբալիզացիայի և բազում այլ խնդիրների ու պրոբլեմների  անչափահասները դաևձել են ավելի խոցելի: Իրավապահ մարմինների խնդիրն է, որպեսզի մենք կարողանանք  անչափահասների  այդ խոցելիությունը վերացնենք կամ գոնե հասցնենք  նվազագույնի»:

Ըստ սեռական բռնության ճգնաժամային կենտրոնի՝ տարեկան ունենում են մոտ 10 դեպք: Այս պահին կենտրոնն աշխատում է սեռական բռնության ենթարկված 15 զոհի հետ, որոնցից 11-ն անչափահաս են: Բազմամասնագիտական անվճար օգնություն  է ցուցաբերվում սեռական ոտնձգությունների զոհերին, փորձում են  համագործակցել պետական և ոչ պետական կառույցների հետ, նշեց կենտրոնի մասնագետ  Աննա Հովհաննիսյանը:

«Ավելի համալիր մոտեցում ենք  ցուցաբերում դեպքին: Չենք աշխատում միայն սեռական բռնության  և դրա հետևանքների հետ, այլ փորձոում ենք ավելի լայն, ավելի զորեղացնող  ծառայություններ մատուցել կնոջը և անչափահասին, ովքեր դիմում են մեզ»: 

«Համահայկական  ծնողական կոմիտե» ՀԿ նախագահ Արման Բոշյանի դիտարկմամբ՝ առկա խնդրի պատճառները մի քանիսն են: Նախ՝ պետք է ճշտել, թե հանցագործություն գործածներից քանիսն են հոգեկան շեղումներով և այն , որ նրանք չեն վերահսկվում պետության կողմից: Երկրորդը պետությունն ուշադրություն չի դարձնում սոցիալապես անապահով խավին, սրան գումարած էլ տեղեկատվական դաշտն  անառողջ է:

Սեռական բռնության զոհ կարող են լինել նաև տղաները: Կենտրոնն իր բազմամյա գործունեության ընթացքում ունեցել է անչափահաս տղա երեխայի մեկ դեպք, իսկ  չափահաս տղաների նկատմամբ սեռական բռնության դեպք կենտրոնը դեռևս  չի գրանցել: