Արմավիրի մարզի տարբեր համայնքների դպրոցներում առարկայական մասնագետների պակասը լրացվել է այլ համայնքներից եկած մասնագիտական կրթություն ստացած ուսուցիչներով, որոնց տրանսպորտային ծախսը կազմում է աշխատավարձի 20-25 տոկոսը:
Պետական բյուջեից «Հանրակրթական դպրոցների մանկավարժներին ու դպրոցահասակ երեխաների տրանսպորտային ծառայությունների մատուցում» ծրագրով փոխհատուցում չի նախատեսվել Արմավիրի, Արարատի և Կոտայիք մարզերին:
Հանրապետության 7 մարզում՝ Գեղարքունիքում, Լոռիում, Սյունիքում, Վայոց Ձորում, Տավուշում և Արագածոտնում պետական բյուջեից փոխհատուցվում են երթևեկող ուսուցիչների և դպրոցահասակ երեխաների տրանսպորտային ծախսերը: Այս ծախսերը ներառված են նաև 2018-2020թվականների պետական միջնաժամկետ ծախսերի ծրագրում: «Համայնքային համախմբման և աջակցության կենտրոն» հ/կ տնօրեն Օլեգ Դուրգարյանը տեղեկացրեց, որ տրանսպորտի փոխհատուցման ծրագրից չեն օգտվում Արմավիրի, Արարատի և Կոտայիք մարզերը, քանի որ իրազեկված չեն:
Բյուջեով նախատեսված ծախսերի իրազեկության պակասը հարվածում է ուսուցիչների գրպանին: Արմավիրի մարզի երթևեկող ուսուցիչների ծախսը միջին հաշվով կազմում է աշխատավարձի 20-25 տոկոսը:
Երթևեկող ուսուցիչները մեծ դժվարություններ են հաղթահարում ժամանակին դպրոց հասնելու համար: Հանրային տրանսպորտի երթևեկության ժամերը չեն համապատասխանում ուսուցչի աշխատանքային ժամերին և նրանք ստիպված օգտվում են տաքսիների ծառայությունից:
Արմավիրի մարզպետարանի կրթության բաժնի պետ Նաիրա Սարգսյանը նշեց, որ մարզում տրանսպորտային ծախսեր տրվել են միայն գործուղված ուսուցիչներին, գիշերօթիկ հատուկ դպրոցներին և և ներառական կրթությանը:
Ուսուցիչների համեմատությամբ քիչ չեն նաև երթևեկող աշակերտները:
Արմավիրի մարզի Ծաղկունք և Կողբավան գյուղերում դպրոց չկա: Տեղի երեխաները սովորում են այլ գյուղերի դպրոցներում: Կողբավանի դպրոցահասակ երեխաներից 7-ը հաճախում է Վանանդի դպրոց: Երեխաների փոխադրումն իրականացվում է Կողբավանի գյուղապետարանի և ծնողների աջակցությամբ: Համայնքի ղեկավար Սերոբ Սերոբյանը նշեց, որ տեղական բյուջեի սուղ միջոցներից վարձատրում են վարորդին, իսկ այլ միջոցներով՝ հոգում մեքենայի շահագործման ծախսերը:
Վանանդն ու Կողբավանը գրեթե սահմանամերձ համայնքներ են, մոտ են գտվում Թուրքիայի պետական սահմանին: Այս դպրոցում երթևեկող ուսուցիչների թիվը 7-ն է: Տնօրեն Հայկ Խաչիկյանը նշեց նրանց դպրոց հասնելու դժվարությունների մասին, քանի որ գյուղում չի գործում հասարակական տրանսպորտը:
«Համայնքային համախմբման և աջակցության կենտրոն» հասարակական կազմակերպությունը «Ճանապարհ դեպի դպրոց» ծրագրի շրջանակներում իրազեկում է երթևեկող ուսուցիչներին և դպրոցահասակ երեխաներին պետական բյուջեից տրվող տրանսպորտայի ծախսերի մասին:
«Ուսուցիչը կամ աշակերտը դիմում է դպրոցի տնօրենին, ներկայացնում է ծրագրով իրեն հատկացվող տրանսպորտային ծախսերի փոխհատուցման գումարի չափը՝ տարվա կտրվածքով, կազմվում է նախահաշիվ, ներկայացվում մարզպետարան, հետո ֆինանսների նախարարություն: Վերջինս վերանայելուց հետո ներառում է պետական ֆինանսավորման ծրագրում»,- ասաց Օլեգ Դուրգարյանը:
«Հանրակրթական դպրոցների մանկավարժներին ու դպրոցահասակ երեխաներին տրանսպորտային ծառայությունների մատուցում» ծրագիրը չի տարանջատում մարզերի աշխարհրագրական դիրքն ու բնակչության խտությունը:
