Արդեն մի քանի տարի է շատ իրանցիներ իրենց ամանորյան տոները՝ Նովրուզը անցկացնում են Հայաստանում։
Տնտեսական զարգացման և ներդրումների նախարարության Զբոսաշրջության պետական կոմիտեի նախագահ Զարմինե Զեյթունցյանը փաստում է՝ տարեց տարի իրանցի զբոսաշրջիկների շրջանում մեծանում է Հայաստանի նկատմամբ հետաքրքրությունը:
Ինչպես է պատրաստվում հյուրընկալել հարևան երկրի զբոսաշրջիկներին Հայաստանը:
Եթե մենք` հայերս Ամանորը նախընտրում ենք տոնել մեր ընտանիքներում, ապա հարևան իրանցիներն այս ընթացքում շրջագայում են, նաեւ Հայաստան։ Հատկապես Նովրուզի օրերին Հայաստանում նկատվում է իրենցի զբոսաշրջիկների մեծ հոսք:
2017 թվականին Հայաստան է ժամանել 220 հազար զբոսաշրջիկ: 2016 –ի համեմատ նախորդ տարի նրանց թիվն աճել է 16 տոկոսով: Տնտեսական զարգացման և ներդրումների նախարարության տվյալներն են: Այս տարի էլ է ակնկալվում տուրիստների աճ, եթե Իրանում բանկային համակարգի հետ կապված խնդիրներ չառաջանան: Նման փորձ արդեն ունեցել ենք, ասում է Զբոսաշրջության պետական կոմիտեի նախագահ Զարմինե Զեյթունցյանը:
«Դոլարի սղության պատճառով շատ պարսիկ զբոսաշրջիկներ չէին կարողացել ճանապարհորդել: Եթե նման էքսցեսներ չլինեն, ապա այսօր Հայաստանը գրավիչ վայր է իրանցի զբոսաշրջիկների համար»:
Հայաստանի նկատմամբ հետաքրքրությունն առավել մեծացնելու նպատակով սահմանային անցակետերում այս տարի բաժանվում են պարսկալեզու բրոշյուրներ, ստեղծվել է 24 ժամյա թեժ գիծ՝ պարսկալեզու մասնագետների ներգրավմամբ: Առողջապահության նախարարության և ոստիկանության հետ տնտեսական զարգացման և ներդրումների նախարարությունը զբոսաշրջիկների անվտանգ մուտքը սահմանից Հայաստան ապահովելու պայմանավորվածություն է ձեռք բերել: Բացի այս, իրանցիներն ամբողջ ճանապարհին կտեսնեն «Շնորհավո՛ր Նովրուզ» և « Բարի գալուստ Հայաստան» խոսքերով պաստառներ: Կլինեն նաև Նորավանք, Ջերմուկ և Տաթևի ճոպանուղի ուղղորդող ցուցանակներ:
« Այսինքն արդեն սահմանային անցման կետից սկսած մենք իրենց ուղղորդելու ենք ինչպես անցկացնել հանգիստը: ձայն 01 Դրանք փոքր, բայց աչք շոյող, գրավիչ գործոններ են, որպեսզի ցույց տանք, որ մենք հյուրընկալում ենք պարսիկ զբոսաշրջիկներին»:
20 տարի Դուբայում ապրած, սակայն արդեն մեկ ու կես տարի Հայաստանում հաստատված իրանցի Հալե Էթեմադիան պատրաստվում է այս տարի ընտանիքով Հայաստանում տոնել Նովրուզը: Ասում է իր հայրենակիցների միջին խավն է նախընտրում Հայաստանը, քանի որ մեր երկրի հետ ունեն ցամաքային ճանապարհ: Այստեղով այցելում են նաև Վրաստան: Իսկ Ադրբեջանը, ի տարբերություն Հայաստանի, ավելի թանկ է:
«Հարևան երկրներ ենք, մոտ է: Բնությունն է շատ լավը և մեր մշակույթներին են նման: Մեզ Հայաստանում լավ ենք զգում: Նոր տարին դիմավորում ենք ընտանիքով, հարազատներով, սակայն հաջորդ օրվանից արդեն փոխադարձ այցելություններ են»:
Իրանցի մեր հյուրը գոհ է հայկական հյուրընկալությունից: Զբոսաշրջության պետական կոմիտեի նախագահ Զարմինե Զեյթունցյանը, սակայն, ևս մեկ անգամ հորդորեց ազգաբնակչությանն ավելի բարեհաճ գտնվել մեր զբոսաշրջիկների հանդեպ: Մեր հասարակությունը, լինելով հյուրընկալ ազգ, այդքան էլ լավ չի վերաբերվում պարսիկ զբոսաշրջիկներին, ասում է:
«Տաքսու վարորդներից սկսած: Նույնիսկ եղել են դեպքեր, երբ ռեստորաններում արգելվել է իրանցիների մուտքը»:
Իրանական Նովրուզի տոները նշվում են մարտի 21-24-ը:
