Հայաստանում մինչեւ 5 տարեկան երեխաների 9 տոկոսը թերսնուցվում է: Սա հինգ տարին մեկ անգամ իրականացվող հետազոտության արդյունքներն են:
Մասնագետները պնդում են՝ շատ կերակրելն ու ճիշտ կերարկելը տարբեր բաներ են, քանի որ, ըստ նրանց, երեխաների կերակրման համար հայ ընտանիքները պատրաստ են ամեն ինչի:
Ավելին, թերսնուցումն ու աղքատությունը ուղիղ գծով չեն կապված միմյանց հետ:
Մարիամ Այվազյանին Սպիտակի տնակային ավաններից մեկում հանդիպեցի: Այստեղ նա բնակվում է եղբոր ընտանիքի ու վեցամյա դստեր հետ: Ծայրահեղ աղքատություն. այսպես կարելի է բնորոշել նրանց կենցաղը: Գործազուրկ ու առողջական խնդիրներ ունեցող կինը երեխային պահելու դժվարություններ ունի: Նա չի կարողանում հոգալ վեցամյա դստեր համար անհրաժեշտ սնունդի հարցը
«Մակարոն ու կարտոֆիլ, ուրիշ բաներ չեմ կարողանում պահել»:
Մսամթերք հազվադեպ են օգտագործում: Երեխայի համար միս գնում են հարևանները: Հայաստանում անցած տարի մինչև 18 տարեկան երեխաների 2.0%-ը ապրում է ծայրահեղ աղքատության, իսկ 34.2%-ն` աղքատության մեջ: Սա Հայաստանի ԱՎԾ 2016-ի տվյալներն են:
Իսկ 5 տարին մեկ անգամ երեխաների շրջանում միջազգային կառույցներն են ուսումնասիրություններ իրականացնում: «Վորլդ Վիժն- Հայաստանի» վաղ մանկական զարգացման ծրագրի ղեկավար Կարինե Աբելյանը ներկայացնում է մինչեւ 5 տարեկան երեխաների շրջանում անցկացված հետազոտության արդյունքները:
Ուսումնասիրել ու պարզել են՝ երեխաների թերսնուցումը կապված չէ նրանց սոցիալական վիճակի հետ: Այն ավելի շատ ծնողների ու հատկապես մայրերի կրթվածությամբ է պայմանավորված: Թերսնված երեխաները երկու անգամ ավելի շատ են այն ընտանիքներում, որտեղ մայրը չունի համապատասխան գիտելիքներ: Մանկաբույժ, «Վստահություն» Հ/Կ նախագահ Սուսաննա Հարությունյանն ամեն օր է շփվում երեխաների հետ:
Նշում է՝ շատ երեխաներ աճի հետ կապված խնդիրներ չունեն, բայց ունեն տարբեր մկրոէլեմենտների խանգարումներ: Արդյունքում՝ նրանք հաճախ են հիվանդանում: Սեփական փորձից է բժշկուհին ներկայացնում ծնողի գիտելիքի պակասի հետևանքով առաջացած խնդիրները:
ԱՍՀՆ սոցիալական աջակցության վարչության պետ Աստղիկ Մինասյանի տեղեկացմամբ՝ 25 հազարից մինչև 105 հազար դրամ է տրամադրվում երեխա ունեցող ընտանիքներին:
Մասնագետները պնդում են՝ փոքր գումարով էլ հնարավոր է երեխաների սննդի հարցերը ճիշտ կազմակերպել։ Ավելին, հորդորում են որևէ դեպքում միրգն ու բանջարեղենը «Կոկա կոլայով» կամ չիպսերով չփոխարինել, չչարաշահել նաև քաղցրավենիքը: Նրանք հիշեցնում են՝ հատկապես կարևոր է երեխայի կյանքի առաջին 1000 օրը՝ հղիության շրջանն ու առաջին երկու տարին:
