Երևանը «պատմական տարածք» համարելու մասին Ալիևի հայտարարությանը հաջորդեց այդ երկրի պաշտպանության նախարարի մեկ այլ հայտարարություն, թե ռազմական գործողությունների վերսկսումը ցանկացած պահի հնարավոր է:
Ռազմատենչ հայտարարությունների շարքին նոր նրբերանգ ավելացրեց Բաքվում Իրանի պաշտպանության նախարարի դիտարկումը՝ տարածքային ամբողջականության վերաբերյալ:
Իրանի պաշտպանության եւ ԶՈՒ աջակցման նախարար Ամիր Հաթամին երկօրյա աշխատանքային այցով Բաքվում է: Նա արդեն հանդիպել է երկրի նախագահի, պաշտպանության նախարարի հետ, շփվել ԶԼՄ-ների ներկայացուցիչների հետ: Ըստ իրանական պաշտոնական աղբյուրների՝ գեներալ Հաթամին
Զաքաիր Հասանովի հետ հանդիպումից հետո, ընդգծել է, որ Իրանը կարևորում է բոլոր երկրների տարածքային ամբողջականությունը, եւ հավելել է. «Մենք հավատարիմ ենք այդ քաղաքականությանը, և Ադրբեջանի մեր գործընկերների հետ հանդիպմանն ընդգծել ենք, որ այդ քաղաքականությամբ կարողացել ենք տարածաշրջանի տարբեր հատվածներում կայունություն հաստատել»:
Հաշվի առնելով Իրանում անջատողականության սպառնալիքը՝ իրանագետ Արմեն Իսրայելյանը լիովին հասկանալի է համարում, որ Իրանը պետք է ընդգծի տարածքային ամբողջականության պահպանման կարևորությունը: Ուշագրավ է, որ իրանցի բարձրաստիճան զինվորականը խոսել է ընդհանրական՝ բոլոր երկրների տարածքային ամբողջականության պահպանման անհրաժեշտության մասին՝ չառանձնացնելով Ադրբեջանը: Սա անհասցե հայտարարություն էր՝ միտված կայունության պահպանմանը ՝ ասում է փորձագետը:
«Ի դեպ, անդրադարձ չի եղել Ղարաբաղայան հակամարտությանը: Այսինքն որոշ դեպքերում նախագահը, արտգործնախարարը, ՊՆ այլ առիթներով անդարադառնալով ղարաբաղայան հակամարտությանը խոսել են տարածքային ամբողջականության մասաիան կմրկին նման ձեւակերպումներով, բայց այս անգամ ընդհանուր ձեւակերպում էր»:
Ադրբեջանական լրատվամիջոցներն այս անգամ նույնպես հայտարարությունը մեկնաբանել են սեփական ցանկությունների տեսանկյունից: «Ռազմինֆո» կայքի ադրբեջանական բաժնի վերլուծաբան Տարոն Հովհաննիսյանը հերթական խեղաթյուրված փաստն է արձանագրում՝ ներկայացնելով ադրբեջանական տեսակետը:
«Եթե պարբերաբար նայեք Ադրբեջան այցելած պաշտոնյաների այցելության ժամանակ հնչած հայտարարություններին նշվում է, որ այդ պաշտոնյան ասել է, իբրեւ, որ ճանաչում է Ադրբեջանի տարածքային ամբողջականությունը եւ պաշտպանում Ադրբեջանի դիրքորոշումը: Իսկ իրականում, երբ նայում ենք տվյալ երկրների համապատասխան մարմինների հաղորդագրությունը, հայտարարության պատկերն այլ է՝ ավելի շատ պրոտոկոլային բնույթի է: Այս դեպքում Իրանի ՊՆ հայտարարել է, որ պաշտպանում է բոլոր երկրների տարածքային ամբողջականությունը»:
Մեջբերելով Իրանի ՊՆ հայտարարությունից մի հատված, որ Իրանը կողմանակից է միջազգային նորմերի եւ սահմանների ճանաչման շրջանակներում հարցերը կարգավորելուն ՝ Տարոն Հովհաննիսյանը շեշտում է, որ անգամ չկա հստակություն, թե Ադրբեջանի համար, որն է տարածքային ամբողջականություն ասվածը:
Իրանագետը նաև նկատում է՝ Արցախն Իրանի հասարակական-քաղաքական շրջանակների ընկալումներում թեև չճանաչված, սակայն անկախ պետական միավոր է, ուստի Իրանի պաշտպանական գերատեսչության ղեկավարի՝ տարածքային ամբողջականության մասին ձևակերպումը կարող է վերաբերել նաև Արցախին՝ ասում է Իսրայելյանը, եւ փաստում՝ Իրանի հյուսիսային շրջանը սահմանակցում է Ղարաբաղին և իսլամական հարապետության պետական շահերին համահունչ է, որ այդ հատվածում կայունություն լինի:
