Արագածոտնի մարզի Արագածավան գյուղի թիվ 2 դպրոցում «Հայաստանի Մանուկներ» հիմնադրամի նեխաձեռնությամբ գործում է «Իմ թատրոն Արագածավան» թատերախումբը, որտեղ ներառված են նաև տարբեր խնդիրներ ունեցող երեխաներ:
Հոգեբանական թատրոնն օգնում է երեխաներին հաղթահարել բոլոր դժվարություններն ու ազատվել բարդույթներից: Նրանք ներկայացրել են Օսկար Ուայլդի «Արտացոլանք» բեմադրությունը:
Օսկար Ուայլդի ստեղծագործության հիման վրա բեմադրված «Արտացոլանք» ներկայացման դերակատարները ոչ թե դերասաններ են այլ դպրոցականներ: «Իմ Թատրոն Արագածավան» թատերախմբում ներառված են նաև հաշմանդամություն ունեցող երեխաներ Արարագածոտնի մարզի Արագածավան և Արմավիրի մարզի Լեռնագոգ գյուղերից:
Ներկայացման հերոսները ծաղիկներն են ու կուզիկը: Վերջինիս մարմնավորում էր 13-ամյա Ժակ Սրապյանը: Նա սկզբում դժվարացել է կերպարի մեջ մտնել, ապա հաղթահարել դժվարությունները:
«Հայաստանի Մանուկներ» հիմնադրամի նախաձեռնած «Իմ թատրոնը» ծրագրի շրջանակներում հոգեբանական թատրոններ են գործում Քարակերտի, Գետաշենի և Արագածավանի դպրոցներում: Հոգեբանական թատրոնը նպաստում է երեխաների զարգացմանը, ինքնահաստատմանը, բնավորության կայունացմանը:
Թատրոնում ներառված են հոգեբանական և ֆիզիկական դժվարություններ ունեցող երեխաները: Էմին Մկրտչյանը հենաշարժական խնդիր ունի, տղան օգնությամբ է քայլում, սովորում է Լեռնագոգի դպրոցում: Նարգիզի դերակարն էր լինելու, բուժման պատճառով այս անգամ բեմում չէր, սակայն ընկերների խաղը դիտելու համար հասել էր Արագածավան:
«Բուժումն ինձ համար ամենակարևորն էր, ես մասնակցել եմ ներկայացման փորձերին, կարևոր էր նաև դիտել ընկերներիս խաղը: Վերականգնվելուց հետո ես նրանց հետ նույն բեմում կլինեմ, մյուս ներկայացումնում` կխաղամ», -ասաց 14-ամյա Էմինը:
Հոգեբանական թատրոնի ղեկավար Մարինե Ասատրյանը սիրով է աշխատում երեխաների հետ` նրանց դարձնելով փոքրիկ դերասաններ: «Իմ թատրոնն» ուղղորդում է երեխաներին նաև մասնագիտական կողմնորոշման մեջ: Լեռնագոգի դպրոցից Աիդա Գրիգորյանն արդեն ընտրել է իր մասնագիտական ուղին, ձմեռ պապիկին այդ մասին է նամակ գրելու` ուզում է հմտանալ դերասանական վարպետության մեջ: Սոխակի դերակատարն էր:
«Իմ թատրոնը» բացահայտում է երեխաների մեջ թաքնված տաղանդն ու դուրս բերում նրանց տարբեր բարդույթներից: Այստեղ բոլորը հավասար են, օգնում են միմյանց և չեն նկատում խնդիրները: Հենաշարժական և խոսելու դժվարություններ ունեցող Մարիամն անթաքույց ուրախությամբ է մասնակցել թատրոնի փորձերին ու բարձրացել բեմ: Աղջիկը տարիներ շարունակ մեկուսացած է եղել հասարակությունից և դպրոց չի գնացել: Հիմա ամեն ինչ փոխվել է: Նա անհամբերությամբ է սպասում ներկայացման փորձերին: Հեքիաթում ծաղիկների թագուհու կերպարը շատ էր դուր եկել նրան: 20-ամյա աղջիկը ներկայացումից հետո, ինչ ես ուզում դառնալ հարցին, կատակով պատասխանեց` վարդի թուփ:
