Անի Մինասյան
«Ռադիոլուր»
Արգենտինական տանգոյի շաբաթվա եզրափակիչ միջոցառումը բացօթյա տանգո-շոուն էր, որը տեղի է ունեցել Հյուսիսային պողոտայում: Միջոցառման ընթացքում ներկաները հնարավորություն են ունեցել վարպետության դաս առնել արգենտինացի պարողներ Խորխե Մենդոսից և Սեսիլիա Մասսեից:
Արգենտինական տանգոյի հնչյուններն այսօր բազմաթիվ այցելուների համախմբել էին Հյուսիսային պողոտայում: Հայ-արգենտինական դիվանագիտական հարաբերությունների հաստատման 25-ամյակին նվիրված եզրափակիչ միջոցառումը համընկել էր Երևանի տոնին:
Ամփոփելով արգենտինական տանգոյի շաբաթը Հայաստանում՝ տանգոյի երկրից ժամանած պարուսույցներ Խորխե Մենդոսան և Սեսիլիա Մասսեն անցկացրին վարպետության դաս՝ երևանցիների համար:
Շտապում էին, ու չկարողացան հարցիս պատասխանել, թե արդյո՞ք հեշտ է հայերին տանգո սովորեցնել: Փոխարենը՝ ինձ ցույց տվեցին տանգոյի ամենահայտնի շարժումներից մի քանիսը:
Արգենտինական տանգոն սիրո ու տաք պար է, մենք՝ ավելի հանգիստ՝ եվրոպական տանգոյին ենք սովոր: Ժամանակը կարճ է տանգո սովորելու համար, սակայն երևանցիները վստահ են, որ նման հնարավորություն դեռ էլի կունենան:
