Վանաձորի երեխայի խնամքի և պաշտպանության թիվ 1 գիշերօթիկ հաստատությունը շուտով վերակազմակերպվելու է երեխայի և ընտանիքի աջակցության կենտրոնի և հաստատության երեխաները վերադառնալու են ընտանիք: Սոցիալական բարեփոխումների իրականացման համար ավարտվել են հաստատության երեխաների դեպքերի վարումն ու գնահատվել կարիքները: Նոր կազմակերպվող կենտրոնը մասնաճյուղեր է ունենալու Ալավերդի, Սպիտակ և Ստեփանավան քաղաքներում:
Սոցիալական ոլորտի բարեփոխումների շրջանակում Վանաձորի երեխաների խնամքի և պաշտպանության թիվ 1 գիշերօթիկ հաստատությունը կրկին վերակազմակերպման փուլում է: Վերջին գործընթացն իրականացվել էր 2007 թվականի սեպտեմբերի 1-ին, իսկ առաջիկայում հաստատությունը դառնալու է երեխայի և ընտանիքի աջակցության կենտրոն , բայց ոչ թե պետական ոչ առևտրային կազմակերպություն, այլ՝ հիմնադրամ: Տարբերությունը լայն հնարավորությունների ընձեռումն է: Լոռու մարզպետարանի աշխատակազմի ղեկավար Նարեկ Սարգսյանը պարզաբանում է, որ նոր ձևավորվող կառույցում կկազմակերպվի շուրջ 250 երեխայի ցերեկային խնամքը:
Նարեկ Սարգսյանը նշեց, որ մարզում նոյեմբերի 1-ից կարող են սկսել ցերեկային խնամքի կենտրոնի աշխատանքը, քանի որ ավարտվել է հաստատության երեխաների դեպքի վարումն ու կարիքների գնահատումը: Վանաձորի երեխաների խնամքի և պաշտպանության թիվ 1 գիշերօթիկում ներկայում կա 74 երեխա: Հաստատությունում խնամվում են անապահով ընտանիքների 0-17 տարեկան երեխաները: Թիվ 1 գիշերօթիկ հաստատության տնօրենի ժամանակավոր պաշտոնակատար Մարիամ Ապերյանը նշեց, որ ընտանիքի հետ համագործակցության արդյունքում երեխաները վերադառնում են ընտանիք:
«Որքան էլ մենք որակյալ ծառայություներ մատուցենք ու հոգատար վերաբերմունք դրսեվորենք, միևնույն է, երեխայի համար ծնողը մնում է անփոխարինելի: Եթե մենք լուծում ենք երեխայի ընտանիքի սոցիալական խնդիրները և երեխային վերադարձնում ընտանիք, ապա սոցիալական աջակցության մյուս տեսակները մոտեցնում ենք ընտանիքին, ուժեղացնում ընտանիքը և ապահովում երեխայի ընտանիքում ապրելու իրավունքը»:
Ներկայում կանխարգելվում է երեխաների մուտքը գիշերօթիկ հաստատություն: Պետությունը այլընտրանքային ծրագրերի միջոցով որդեգրել է ընտանիքների ուժեղացման քաղաքականությունը:
Օրերս նույն ընտանիքի 2 երեխա նույնպես վերադարձել է ընտանիք: Աշխատանքը կազմակերպվել էր համայնքի ղեկավարի հետ միասին և անօթևանության կարգավիճակում գտնվող ընտանիքին Ստեփանավանի գյուղերից մեկում տրամադրվել է բնակարն, իսկ ծնողին՝ աշխատանք:
Երեխաները ձգտում են ապրել ընտանիքում, սակայն կյանքի դժվարին իրավիճակներից ելնելով նրանք այժմ ապրում են գիշերօթիկում: Փորձառու մանկավարժ, նախկին տնօրեն Հասմիկ Ներկարարյանն ասում է, որ երեխաներն անհամբերությամբ են սպասում շաբաթ օրվան, երբ պետք է գնան տուն և նկատել գիշերօթիկում մնացող երեխաների ապրումները:
Ընտանիքներ կան, որտեղ երեխաների մնալը վտանգված է և երեխաների շահերից ելնելով են պահում հաստատությունում:
Լոռու մարզում երեխայի և ընտանիքի աջակցության կենտրոններ լինելու են Վանաձորում, Ալավերդիում, Ստեփանավանում և Սպիտակում: Չի բացառվում, որ կյանքի դժվար պայմաններում հայտնված երեխաներն ուղղորդվեն խնամատար ընտանիքներ կամ նոր կազմակերպվող մանկան փոքր տներ: Վանաձորի երեխաների խնամքի և պաշտպանության թիվ 1 գիշերօթիկ հաստատությունում լավ պայմաններ են ստեղծված երեխաների խնամքի կազմակերպման համար: Գիշերօթիկից հանրակրթական դպրոցներ երեխաները մեկնում և վերադառնում են ուղեկցությամբ, պատրաստում դասերը, ազատ ժամերին խաղում:
Վանաձորի երեխայի խնամքի և պաշտպանության թիվ 1 գիշերօթիկ հաստատությունում դեռ մայիս ամսին ապրել է 105 երեխա, նրանց մի մասը վերադարձել է ընտանիք:
