Պետք է արդյոք զարմանալ տարածքների վերադարձի մասին հայտարարությունից թե ոչ: Քաղաքագետ Անդրանիկ Միհրանյանը ապշում է նկատվող զարմանքից, ասելով թե այդ մասին բազմիցս է հայտարարվել ու անիմաստ է զարմանքը: Դեսպան Արման Նավասարդյանն սակայն հիշեցնում է Բաքվից հնչող հայատյաց հայտարարություններն ու զգուշության կոչ անում:
Ղարաբաղյան խնդրում ամենացավոտ հարցը հասարակության շրջանում, թերևս, տարածքների վերադարձի մասին հայտարարությունն է: Երեկ հերթական անգամ ՀՀ ԱԳՆ խոսելով տարածքների վերադարձի մասին նշեց, որ խոսքը այն տարածքների մասին, որոնք անվտանգության իմաստով սպառնալիք չեն լինի Ղարաբաղի ու ղարաբաղյան խնդրի հանգուցալուծման համար:
Քաղաքագետ Անդրանիկ Միհրանյանը տարօրինակ է համարում Հայաստանում տարածքների վերադարձի թեմայի շուրջ երբեմն նկատվող զարմանքը:
«Ինձ թվում է, որ եթե չեն ուզում լսել՝ չեն լսում: Ստատուսն ընդունելը ռեվոլյուցիոն բան կլինի։ Փաստորեն Ալիևը կփաստի, որ դրանք իր տարածքները չեն»:
Նրա համար զարմանալի է «ոչ մի թիզ հող» հայտարարությունը:
Արտակարգ և լիազոր դեսպան Արման Նավասարդյանը հարկ համարեց որոշ հիշեցումներ անել ու հասկացնել, որ Բաքուն հակված չէ նորմալ հարաբերություններ հաստատել:
Ընդհակառակը՝ անընդհատ հայատյաց հայտարարություններ անելով՝ այդ երկրի ղեկավարությունը իր ժողովրդին տրամադրում է պատերազմի, ատելություն ու թշնամանք է սերմանում սերունդների մեջ:
Այսօր Նյու Յորքում սկսվում է ՄԱԿ- ի ԳԱ հերթական նստաշրջանը, որի ընթացքում նախատեսվում է Նալբանդյան-Մամեդյարով հանդիպումը։ Օրակարգի գլխավոր հարցը Հայաստանի ու Ադրբեջանի նախագահների հնարավոր հանդիպումը նախապատրաստելու թեման է, ինչին ձգտում են ԵԱՀԿ ՄԽ համանախագահները։
