Այսօր կառավարության նիստից հետո բնապահպանության, արտակարգ իրավիճակների նախարարներն ու գյուղատնտեսության փոխնախարարը Խոսրովի անտառում տեղի ունեցած աղետին են անդրադարձել: Նրանք հայտարարել են՝ ամեն ծառի ու բուսատեսակի համար պայքար այսօր էլ է մղվում: Այրված տարածքներում վնասների գնահատականները դեռ նախնական են, պաշտոնյաները վստահեցրել են, որ շարունակելու են թափանցիկ աշխատել:
Խոսրովի արգելոցի հրդեհը մարված է, սակայն հետմարման աշխատանքները՝ ոչ՝ այսօր կառավարության նիստից հետո լրագրողներին փոխանցեց ԱԻ նախարար Դավիթ Տոնոյանը: Նրա խոսքով՝ ԱԻՆ անձնակազմը շարունակում է տեղում լինել՝ ծխացող օջախներ կան՝ իրարից մոտ 4 կմ հեռավորության վրա են աշխատանքները կատարվում: Խոսրովի արգելոցում բռնկված հրդեհը, սակայն, անդառնալի կորուստներ տվեց՝ նախնական տվյալներով, 1600 հեկտար տարածքից 250 հեկտարը այրվել է:
Խոսրովի արգելոցում մասսայական ծառատունկ հնարավոր չի լինի կազմակերպել։ Ոլորտի պատասխանատուն բացատրությունն ունի՝ արգելոցային ռեժիմը թույլ չի տալիս որևէ միջամտություն կատարել, այստեղ գործում է խիստ ռեժիմ: Գյուղատնտեսության փոխնախարար Աշոտ Հարությունյանի վստահեցմամբ՝ «Ամեն ծառն էլ մեզ համար թակն է, քանի որ Հայաստանը սակավանտառ է: Քայլեր պետք է ձեռնարկվեն նմանատիպ խնդիրները հնարավորինս արագ լուծելու համար»:
Բնապահպանության նախարարի խոսքով՝ խոշոր կաթնասունների կորուստներ արձանագրված չեն, որոշակի կորուստներ կան սողունների ու կրծողների մասով:
Աշխարհագրագետ Աշոտ Խոյեցյանը նշում է՝ 2004թ.- ից են վտանգների մասին ահազանգում, նաև ընդգծում է՝ «Աղետների պատրաստավծության մակարդակը ցածր է: Սա որևէ եմկը չիփ որձում հերքել: Ճիշտ է ԱԻՆ-ը ու բոլորն էլ հնարավորինս արեցին ամեն ինչ, սակայն, ողջ պրոֆեսիոնալիզմի բացակայությունը պրոբլմեը լուրջ մարակդակի հասցրեց»:
Այն, որ տեխնիկական խնդիրներ կային, չեն հերքում նաև ԱԻՆ-ում։ Միայն թե, ինչպես ԱԻ նախարար Դավիթ Տոնոյանն է արդեն քանիցս հայտարարում՝ հրդեհի մարման համար ՌԴ-ին ժամանակին են դիմել ու անմիջապես աջակցություն ստացել։ Ի դեպ՝ անվճար: Իսկ ԱԻՆ-ը դեռ կվճարի, բայց աշխատողներին:
«Մեր հրշեջների խրախուսումը դեռ չի կատարվել, բայց սեպտեմեբրի 4-ին ԱԻՆ-ում արտակարգ իրավիճակների օրը բոլորը պարգևատրվելու են: Բայց մենք իրենց խոսքով խրախուսում ենք»:
Բնության համաշխարհային հիմնադրամի հայաստանյան մասնաճյուղի տնօրեն Կարեն Մանվելյանը «Ռադիոլուր»-ին փոխանցել էր, որ հրդեհից մի քանի օր առաջ Խոսրովի անտառ արգելոցին տրամադրել էին ուսապարկ-տարաներ՝ հենց հրդեհների մարման համար: Սակայն դրանք բավարար չեն: ԱԻՆ-ը համապատասխան տեխնիկա ձեռք բերելու ուղղությամբ աշխատանքներ է իրականացնում:
