Սևանա լճից լրացուցիչ 100 մլն խորանարդ մետր ջրառը չլուծեց ոռոգման խնդիրը: Ոլորտի պատասխանատուներն այս խրողությունը չեն հերքում, ավելին՝ հորդորում են անցնել ոռոգման կաթիլային համակարգին: Դրա դիմաց կառավարությունը գյուղացիներին մատչելի վարկեր է խոստանում, համապատասխան սարքավորումների ներկրման դեպքում՝ նաև մաքսային վճարների հետաձգում: Վերջինը , ի դեպ, վարչապետի այսօր հնչեցրած հանձնարականներից է:
Գյուղատնտեսական տարվա այս փուլում գյուղացիները լուրջ խնդրի առջև են: Նրանց մեծ մասը՝ տարբեր մարզերում, ոռոգման ջրի խնդիր ունի՝ Արարատ, Արմավիր, Աևագածոտն և ոչ միայն : Թվարկումը կարելի է շարունակել
Ոլորտի փորձագետները նույնպես փաստում են՝ ոռոգման ջրի հարցը լուրջ խնդիր է Հայաստանում: Ագրարագյուղացիական միավորման նախագահ Հրաչ Բերբերյանը փաստում է՝ մեր երկրում ջրամբարների լցվածության խնդիր կա:
Հայաստանի ոռոգման համակարգը չփրկվեց անգամ Սևանա լճից լրացուցիչ 100 մլն խորանարդ մետր ջրի բաց թողնման որոշումից հետո: Գյուղատնտեսության նախարար Իգնատի Առաքելյանն այսօր հաստատեց՝ ջերմաստիճանը բարձր է, անձրևները՝ քիչ:
Հայաստանի ոչ բոլոր գյուղերն են ոռոգվում Սևանա լճից բաց թողնվող ջրով՝ ասաց նախարարը՝ խոստովանելով՝ Ախուրյանի ջրամբարում ջուրը քիչ է: Թե ինչու են ջրամբարները դատարկ այս տարի, հարցի պատասխանն ունի ջրային տնտեսության պետական կոմիտեի նախագահ Արսեն Հարությունյանը:
Հայաստանում ջրային պաշարների նվազման պատճառներն ըստ մասնագետների տարբեր են: Հստակ է միայն մոտեցումներից մեկը՝ կառավարությունը գյուղացիներին հորդորում է հնարավորինս արագ անցում կատարել ոռոգման կաթիլային համակարգին՝ խոստանալով մատչելի վարկեր, իսկ համապատասխան սարքավորումների ներկրման դեպքում ՝ նաև մաքսային վճարների հետաձգում:
