Լուսինե Ավանեսյան
«Ռադիոլուր»
Ստեփանակերտի մանկապարտեզների մեծ մասն այս օրերին ընդունելություն չի կատարում. կարանտին է հայտարարված: Ջրծաղկի եւ քութեշի վարակի պատճառով մանկապարտեզ կարող են ընդունվել միայն այն երեխաները, որոնք նախկինում արդեն վարակվել են: Սա ավելի է սրում մանկապարտեզի ընդունելության հարցը՝ Ստեփանակերտում նախադպրոցական երեխաների թիվը մի քանի անգամ գերազանցում է մանկապարտեզներում տեղերի քանակին:
Բժիշկ հակահամաճարակաբան Ջուլիետտա Մուսայելյանը վիճակը ներկայացնելով չի թաքցնում նաեւ զարմանքը.«Այս վարակները սեզոնային բնույթ ունեն. թե՛ ջրծաղիկը, թե՛ քութեշը հիմնականում աշուն- ձմեռ եւ ձմեռ գարուն անցումային ժամանակաշրջանին են հատուկ: Բայց այս տարի բացառություն է, չնայած սովորաբար ամռանը դրանք պիտի անկում ապրեն, հիմա այնպիսի աճ ունենք ինչպես ձմռանը»:
Բժիշկը նաեւ ասում է, որ համաճարակի վտանգ չկա. հոսպիտալացված ընդամենը երեք հիվանդ կա, այն էլ մեծահասակների խմբում, ովքեր ծանր են տանում ջրծաղիկը: Թե՛ ջրծաղկով, թե՛ քութեշով հիմնականում կրտսեր տարիքի երեխաներն են հիվանդանում, այս անգամ էլ վարակը սկսվել է մանկապարտեզներից, որտեղ փոքրիկների կուտակումներ կան. կրթօջախներց դուրս վարակվել են հիվանդ երեխաների հետ շփվողները: Այդպիսի շփումը 95 տոկոսի դեպքում վարակում է նշանակում: Հենց սա է պատճառը, որ մանկապարտեզներում գոնե մեկ դեպքի հայտանբերման դեպքում կարանտին է սահմանվում: Հիվանդ երեխան մեկուսացվում է, բայց մյուսները շարունակում են հաճախել մանկապարտեզ, նրանք ամեն առավոտ ֆիլտրացիայի են ենթարկվում, չափվում է նրանց ջերմությունը:
«Եթե կասկածելի երեխաներ են լինում’ ջերմությամբ, ցանով կամ վատ ինքնազգացողությամբ, ապա միանագամից նրանք մեկուսացվում են եւ ուղարկվում տուն»:
Ինչքան կարող է ձգվել մանկապարտեզներում հայտարարված կարանտինը եւ երբ կարող է սկսվել երեխաների ընդունելությունը: Բժիշկ հակահամաճարակաբանի մեկնաբանությամբ կախված է նոր դեպքերից: Վերջին շաբաթվա տվյալներով վարակի անկում կա:
