Լուսինե Ավանեսյան
«Ռադիոլուր»
ԼՂՀ իշխանությունները տեր են Արցախի տարածքում գտնվող բոլոր հուշարձաններին՝ անկախ դրանց կրոնական պատկանելությունից: Այս դիրքորոշման արտահայտությունը 1883 թվականին կառուցված Շուշիի Վերին մզկիթի վերականգնումը կհանդիսանա: Երեկ Արցախի էկոնոմիկայի նախարարությունը եւ պարսկական <<Փարթ Սաման Ջահան Կո>> ընկերությունը վերականգնման աշխատանքների նախագծա-նախահաշվային փաստաթղթերի հանձնման-ընդունման արձանագրություն ստորագրեցին: Վերակառուցման աշխատանքների ֆինանսավորման համար միջոցների հայթայթումը ստանձնել է <<Արեւելյան պատմական ժառանգության>> վերածնունդ հիմնադրամը:
Շուշիի Վերին Մզկիթի վերականգնման աշխատանքների վերաբերյալ պայմանավորվածությունը՝ <<Արեւելյան ժառանգության պահպանման>> հիմնադրամի միջնորդությամբ՝ պարսկական նախագծող ընկերության հետ ձեռք է բերվել մեկ տարի առաջ: Անցած ժամանակամիջոցում ընկերությունը ուսումնասիրել է ոչ միայն մահմեդական հուշարձանի, այլեւ Շուշիի պատմությունը՝ ասում է <<Փարթ Սաման Ջահան Կո>> ընկերության տնօրեն Սայադ Նավահանդին՝ լրացնելով, որ իրենք քաղաքականությունից հեռու մարդիկ են եւ հարցին մոտեցել են զուտ մասնագիտական տեսանկյունից:
Էկոնոմիկայի փոխնախարար Սերգեյ Շահվերդյանի խոսքով՝ Արցախի իշխանությունը տեր է երկրի տարածքում գտնվող բոլոր հուրձաններին եւ պարսկական ընկերության հետ համագործակցությունից գոհ են:
Երեկ համագործակցության առաջին փուլի ավարտը նշանավորվեց նախագծա-նախահաշվային փաստաթղթերի հանձնման- ընդունման մասին արձանագրության ստորագրումով: Ըստ նախագծողների՝ փորձել են պահպանել մզկիթի պատմական ու ճարտարապետական տեսքը` նաեւ որոշակի գործառնական նշանակություն վերապահելով: Ընտրությունը սակայն իշխանություններին է՝ ասում է Սայադ Նավահանդին:
Սերգեյ Շահվերդյանի խոսքով` հարցը դեռեւս որոշված չէ: Քննարկվում են երկու տարբերակներ՝այն կմնա որպես չգործող մզկիթ, կամ կվերածվի թանգարանի:
Շուշիի պարսկական մզկիթը վերականգնվելու է ոչ պետական միջոցների հաշվին: Ֆինանսական միջոցների հայթայթման գործը ստանձնել է <<Արեւելյան ժառանգության վերածնունդ>> հիմնադրամը:
