«Յանդեքս» ընկերության մուտքը հայկական շուկա ուղեկցվեց տաքսի ծառայություն մատուցող տասնյակ ընկերությունների, ինչպես անհատ տաքսու վարորդների դժգոհություններով։ Նրանք պնդում էին, որ ընկերությունը օրենքի խախտումներով է աշխատում: Տնտեսական մրցակցության պաշտպանության պետական հանձնաժողովը սեփական նախաձեռնությամբ մամուլի հրապարակումների հիման վրա ուսումնասիրել է խնդիրը։ Արդյունքները հրապարակվել են այսօր։
Այս տարվա հուլիսի 1- ից հայաստանյան տաքսի շուկայում բում գրանցվեց: Ռուսաստանյան «Յանդեքս» տաքսի ծառայությունը մտավ հայկական շուկա՝ անհամեմատ ցածր գներ առաջարկելով ուղևորներին, աշխատանքային ավելի լավ պայմաններ՝ վարորդներին: Ինտերնետ տիրույթում աշխատող այս ընկերությունը սկզբնական փուլում առաջին երկու կմ համար սահմանել էր 100 դրամ սակագին, որից հետո յուրաքանչյուր մեկ կմ դիմաց գանձում էր ՝ կրկին հարյուր դրամ: Սակայն այս սակագնով հայկական շուկայում ընկերությունը երկար չաշխատեց: Փոխվեց գնային քաղաքականությունը, մամուլում էլ սկսեցին դժգոհությունները: Արդյունքում՝ այս ընկերության գործունեությունը հայտնվեց ՏՄՊՊՀ ուշադրության կենտրոնում:
Այսօր պարզ դարձավ, որ ընկերությունը ոչ թե ռուսական , այլ հոլանդական է, Հայաստանում էլ գրանցված չէ, չունի գրասենյակ: Սա որոշակի դժվարություն է ստեղծում հենց հանձնաժողովի համար: Ընկերության գլխավոր տնօրեն Տիգրան Խուդավերդյանը հայտարարեց, որ առաջիկայում պատրաստվում են իրավիճակը փոխել: «Յանդեքսը» մեծ կազմակերպություն է, նմանատիպ որոշումները տնօրենների խորհուրդն է ընդունում»,- ասում է։ Ընկերության գլխավոր տնօրենը, խոսելով գնային քաղաքականության փոփոխության մասին, նշեց, որ այժմ առաջին երկու կմ 200դրամ է, յուրաքանչյուր հաջորդ կմ 100 դրամ, գնային փոփոխությունը նա խցանումներով, ծախսերի ավելացմամբ է պայմանավորում:
ՏՄՊՊՀ- ն խնդիրն ուսումնասիրելիս պարզել էր, որ էլեկտրոնային հարթակներով տաքսի ծառայություն մատուցող վարորդները լիցենզավորված չեն, հարկային դաշտում չեն գործում: ՏՄՊՊՀ նախագահ Արտակ Շաբոյանի խոսքով՝ «հանձնաժողովի գնահատականը հետևյալն է՝ այս վարքագիծն իր մեջ պարունակում է հակամրցակցային գործունեության տարրեր, արդյունքում՝ հնարավոր է, որ մրցակիցները շուկայից դուրս մղվեն»:
Հակամենաշնորհային մարմինը սակայն որոշեց ոչ թե տուգանել, այլ՝ նախազգուշացնել ընկերությանը՝ հաշվի են առնել մի շարք հանգամանքներ։ «Ընկերությունը նոր է, ծավալները շուկայում մեծ չեն, կարևորը, որ ընկերությունը պատրաստակամություն է հայտնել վերացնել այս խնդիրները»։
Էլեկտրոնային հարթակներում գործունեություն իրականացնող ընկերությունը գտնվում են անհավասար մրցակցային պայմաններում սովորական տաքսի ծառայությունների համեմատ: էլեկտրոնային հարթակներով ծառայությունները ՏԿ և ՏՏ նախարարությունից լիցենզիա չեն ստանում, արտոնագրային ու եկամտային հարկ չեն վճարում: Նրանք մյուսների համեմատ մրցակցային առավելություն են ստանում: Շաբոյանը օրենսդրական փոփոխությունների անհրաժեշտություն է նկատում: Նշում է, որ դիմելու են ՏԿ և ՏՏ նախարարությանը, որտեղից, ի դեպ, մեզ փոխանցեցին, որ իրենք դիմել են օնլայն հարթակում աշխատողներին՝ առաջարկելով աշխատել միայն լիցենզավորված կազմակերպությունների հետ:
Խնդիրը նաև «Յանդեքս» տաքսի ընկերության գլխավոր տնօրեն Տիգրան Խուդավերդյանն է տեսնում, նշում, որ պատրաստվում են այլընտրանք առաջարկել՝ օրինակ, հավաստագիր չունեցող վարորդներին հնարավորություն տալ կամ լիցենզիա ձեռք բերել, կամ իրենց եկամուտի 2 կամ 3 տոկոսը վճարել պետական բյուջե:
